هستريا

ولسْاَني بشوفك طفلة بضافير
بتتميل مع الموجة
ولسه قلبي متشعلق
علي ضفيرتك وع التوكه
ولسه عنيكي نداهه
وندهاني
ولساني
بحسك جوه مني حياة
بتحمل نبض ومعاني
وأشوفك زي ما أنتي زمان
فيونكاتك
وضحكاتك
ولفة شالك الأبيض
مع الدبوس اللي متشعلق بكل حنان
وخدك اللي عاش واحة
مزهر م الخجل بستان
ولساني بحسك نسمة تتحدى
حرارة قلبنا الدفيان
وطيفك نبضة خجلانة
بترسم ضحكة وردية تداعب قلبي لو غضبان
وأحس بلونك الهربان
بيتخبى في لياليا
يا قطة غاوية تتعبني
وانا الغاوي الملاغية
يا حاله عشق مجنونة
كانت تسبح مع روحي بهستريا
****
لكن ياخسارة
فاتك مني كلام ياما
وكان نفسي يكون ليكي
فاتك في السر وشوشتي
ودروشتي في لياليكي
فاتك برضوا حرارة قلبي لو ضمك
وطعم البوسة من روحي
لو مرت في يوم يمك
حاجات ياما
كانت مشتاقة تعيشيها
كانت عطشانة للفرحة
كانت مشتاقة
ترسملك خيوط التُلي والطرحة
مناديلي .........
كانت مشتاقة لخدودك
وأحضاني ......
كانت قادرة تدوب عودي مع عودك
ونبقى في الكيان واحد
مالوش تاني
يا نسياني
انا محتاج أداويني
فمن جواكي رديني
لأن غيابي عن نفسي أنا طول
و بلاش طيفك يقولي أعشقني من الأول