الأربعاء، 31 ديسمبر 2008

أخر قصيدة حب





أحتار معايا القلم
نشف المداد جواه

وحروفي صابها الخرس
مش ناطقة غير الاه
والروح اخدها الورق
وأتفرفطت جواه
راحت وراح الحس
وكذِب القلم لو حَس
يخجل من التشكيل
دي البسمة كت تجميل
علي وش كان بيغش
كذاب يا شاعر قوي
وكذبتك أشعار
ازي بتضحك قوي
وجواك هشيم بالكوم .. وكلاه طروف النار
وازي بتكتب عشق وانت الجريح جامد
وبرغم حداد القلم
جواك الكلام صامد
فرفط بقية غنوتك
علي محتاجين القول
ليِل وقول مواويل

وحذاري من التطويل
ده الليل عليك لو طول محتاج ل 100 قنديل
وضيك خيوط دايبه
حا يموت من التنسيل
وفجرك كذب ومجاش
واللي كتبته بروح
في البيعة راح ببلاش
حاول ما تستناش
قطر الصباح عداك
واللي انت شايفة هناك
الغاز كانت شغلاك
أفرك عينك بالغصب
من غلوشة رؤياك
ده سن القلم مقصوف في أخر قصيدة حب

الاثنين، 22 ديسمبر 2008

ست الحزن



أفتحي أبواب كلامك
قولي كل المستخبي
ليه تخبي
م البدايه
رتبي حروف الحكايا
والبسيني توب مطرز من منايا
كوني يوم زي الصبيا
وأفردي اخر غنايا
فجر صابح فوق ضفايرك
وإِشتهيِ لحسة شفايفك
ويا فنجان قهوة سادة
لو في مرة كنتي قاعدة في قهوة بلدي
دقدقي لي عشرة بلدي
واجمعيهم في الحساب
لو كتاب
الجبر ضايع
اكتبي بطباشير صوابعك
ان انا في هواكي طايع
خربشيهم فوق حيطان مدنة كلامك
وارفعي مـ المدنة صوتك
هللي لمي الهلايل
فوق هلال المدنة شوفي
لفي طوفي
بين قلوب كل الخلايق
اللي كان سكران بكاسك واللي فايق
واللي كان مهموم بعشقك واللي رايق
ولعيالك بصي شوفي
أرمي زغاريدك في طوفي
ضحكيهم ضحكتين
وصبي أخر دمعتين
جوه كاسك
حسي ناسك
واللي كان في العشق ناسك
واللي فاكرك
واللي ناسك
وأقلعي في الخوف مداسك
وأزرعيهم خطوتين
خطوة منك تبقى خضرة
وخطوة كانت للزناتي
وابدري روحك ليلاتي
شق فجر ما نيتهيش
واشبكي دمك في دمي
ميلي ويا الموجة يمي
شدي عودك يبقى اخضر
ده المقدر
كله كان مكتوب عشانك
قصة واحدة
انه جالك
دق باب من بيبانك
نفسة كان ......!!
رخرخي ترابيس بيبانك
افتحيهم
وامنحيني
عقد شرعي
يلتقى عودك بفرعي
ينبت الأفراح بزرعي
وفي علامك علميني
وانتقامك موتيني
وإنسحابك أبعديني
وأنسجامك كلميني
ده اللي قام الفجر صلى لجل ترضي
قام لوحدة
قام وجمع بس قصر /لجل يلحق
رغم ان الفرض فاتة
يوم مماته
مات مأمن
ان نور الصبح كامن
بين ايديكي
ان قرص الشمس خايف
من عنيكي
و بايدكي تحرقي كل القصايد
ده اللي رايد
حاول يسرق الفرض في سنه
قام وشاف القبلتين
اتجاهه كان لقبلة
فوق كفوفك وقت كبر
حط قبُلة
بس قبلىَ
اطلبي ينسون وحلبة
دا انتي لسة فيا حبلة
يوم مخاضك
اولديني بين قصايدك كلمتين
حتى في التشكيل في اسمك خططيني ضمتين
فوق حروف ممدوة منك
ده لأنك
كنتي دنيا / بس مش مخلوقة ليا
او لغيري
واللي كان ممنوع في شرعك
إن يحوم في سماكي طيري
تصيبة لعنة فرعون زمانك
اللي كان شادد ايمانك
انك انتي
كنتي اخر وردة طالعة بين حقول الميتين
كنتي ست الحزن جارف
بين حواري المحرومين
كنتي آيه جوه سورة / ادخلوها امنين
بس بابك كان موارب
طب لمين ...؟؟؟
الشاطر حسن
ما اعتقدش
الشاطر حسن / يا ست الحزن
لما فات
شاف الدمع كحلة في عيون البنات
حس الطيور مسروقة منها الزقزقات
لم كل الذكريات
جوه شنطة من سكات
ولما صابة الأندهاش
راح مجاش
بس كان في الذهن كلمة
ما قلتهاش
انتي أيه....؟؟؟؟
انتي امي ولا بنتي ولا اختي
او حبيبة
ولا احلامي الغريبة
ولا فدادين الكلام
ورغم نسياني لملامحك
لما اصحى او انام
بلتقيكي جوه فنجان الصباح
طعم قهوة فوق لساني
ايد وبتخبط بيباني
نسمة بتهزهز كياني
وافتح الجرنان اشوفك
صورة مرسومة في افيش
حتى دخان السيجارة
كنتي انتي
تدخليني متخرجيش
وابتدي يومي بوجودك
ويبقى يومي كله حيرة
طول نهاري محيراني
و جوه نومي
من كوابيسك بعاني
بردوا لسه مُصر ابداء بيكي يومي
بردوا لسة مُصر أحلم بيكي تاني

الأربعاء، 17 ديسمبر 2008

يا غزلة على الوتر ابليس





وعاش أدم
في أحضان الجنان فيكي
يطوف م الخلد للفردوس
يمر بنهر من ريقك
يخطي يدوس
مابين عنبك ما بين تينك
ويتقسم علي ضلك شجر رمان
ويشرب من نبيد شوقك دفا وامان
ويتغطى بلهفة عطرك المجنون
دفا عطرك علي صدرة
يعيش جوه الدفا مسجون
وباب البدر متوارب
يسرسب من ضياة رغبة
على حسنك و يتعاجب
ويحسد اللي كان واقف يبص يطل
يشوف أرض العشق في شفايفك
ويزرع فوق تضاريسها زهور الفل
وتبقي له ملاك أبيض
وأنسيه
وجنْيه
وكل الكل
علي كتافه
يشيل شوقك
ويقطع بين حقول شوكك
فتدمى كتافه حنية
سنونو الجنة ينده له يداوي له جراح عشقك
ويبداء في الملاغية
وسحرك للعذاب يشتد
يكون للمشتاقين غية
وينسى
بأن في سحرك الممدود
في ايد ابليس
جيوش من دود
بتنخر ستر ورق التوت
وتبقى عورته خوفه
علي ضلعة اللي عاش أعوج
فا ياخد قطمة من خدك
في لحظة ضعف
فيسقط عنه ورق التوت
في لحظتها
من الجنة بسحر عنيكي الأخاذ
صبح مطرود
&&&&
يا عازفة علي الوتر أبليس
في معزوفه وكام كلمة و تفاحه
يكون الموت علي صدرك هدف ادم
وفي التسبيل سبيل راحة
وتبقى الروح في روحك عايشة مرتاحة
ورغم الروح بفعل الموت ما هيش جيه
مابين أيديك تعيش حية
فا تنزل فوق بدن من طين
نتوه في أرض مجهولة ونتفرق علي جبلين
ونتقابل كمان مرة
بدل نور السما من طين
ونتبادل بكسرة عين
ضياع الستر كان لأثنين
عرايا وقت ما خلقنا
بدون التوت
وبعد الخلد في الجنة علي ارض الذنوب
حنموت
وابليسك يغرقنا في بحر الظن والتأويل
يذكرنا بانا كنا في الجنة حجار صمه
كما التماثيل
لا جسمك كان يثير شهوة
ولا تأثير
لادوقت فيها رعشة شفتك لما
ولا عرفنا يعني ايه تقبيل
وأشوف خيرك شبه شرك
كما التوئم
هابيل وقابيل
ومين فيهم صبح قاتل
ومين منا حايبقى قتيل..؟؟
شبعت بعد تفاحتك ولون خدك
الم جارف
شربت بعد رمانك ونهر شفايفك المجنون
انين نازف
فهمت بأن الستر كان انتي
وان الكشف لو مستور كمان انتي
فا حبيتك برغم الذنب
كما انتي
يا خارجة من ضلع كان أعوج وبعد مخاض
وصدري بعد مجيابك صبح انقاض
بفكرك أرضنا جنة
بفكرك بواقي زهرة الرمان .... حا تطرح تحت رجليكي عروق حنة
بفكرك يوم نموت تاني في احضانا
حنرجع بعد تدنسنا تاني الجنة
بفكرك لحظتين صادقين
تكون مني اوتكون منك
تطهرنا
يا بكر في جنتي وأرضي
عشقت موتك في شراييني
عشقت السم في التفاح لو حتى حا يفنيني
عشقت كمان اباليسك
وارضك ويا فراديسك
وعزفك ع الوتر ابليس
وأحب القفلة والترابيس
علي بيبان غضبك الأزلي
واحبك لو كلامي يكون بالجد
أو هزلي

الأحد، 7 ديسمبر 2008

سندريلا





سندريلا


قصة مش كاملة الملامح


قصة مالهاش في التراث أي عازة


وبأِجازة نص وهمي رسمتي صورة


يا سندريلا


كل الوانها تحدد نقطتين


هي ظلمك ويا حلمك والأمير


واللي بينهم سحر ساحر...!!!


بس كان السحر فاشل


لما سحر السحرة شدك


أختاريك حدد الحجم في غبائك


لبسوكي وأرتضيتي


توب وعابك


توب مش شكل توبك


توب وكاشف كل عيبك


توب مطرز / وبإيدكي من ذنوبك


توب وبااااااااااااااااايخ في الموديل


يوحي أن الذوق ده غايب


م اللي صمم واللي نفذ


واللي سحرك


واللي خيط غرزتين


واللي قال أنك مثيرة


وأنتي زي البدر و أكتر


واللي دمع لجل ترضي دمعتين


كلهم راضين غرورك


بس ضاع في العتمة نورك


بين بينين


وبعصاية أبتديتي ترسمي بخوفك مرايا


حاسة أن العمر ضايع


عايشة مش زي الصبايا


شوفتي في مريتك ملامح قلب صافي


قلب حتى البرد يعرف أنه دافي


قلب خايف / خوفة بس عليكي كافي


قلب قادر يشتريكي زي ما نتي


بدون رتوش


قلب لغتة حب وافي


بس أنتي للأسف مفهمتهوش


ولو ذكائك حل الغاز الحكاية


م البداية


كنتي أشتريتي مبعتهوش


كنتي مسكتي في أيد أميرك وأرتقاتي جنب منه


للهوان مسحبتهوش ...!


وأسمحي لي يا سندريلا إني اكسر المرايا


أني أغير في الحكاية


وأسمحي لي مرة تانية قبل انتهاء الوقت المحدد بثواني


إني اخط بدم خوفك النهاية


وقبل ما أنهي الحكاية


الأمير عند وعدة لما وعدك


يوم تموتي ....


راح تموتي ..مرة واحدة ...جوه منه


وقلبة برضوا حا يبقى كفنك


غزلة من حب وحنين


أما دفنك وقت دفنك


جوه قلبه


بين عذارى الياسمين




تن تن


دقت الساعة 12بالتمام


وأنتهى وقت الكلام


أنتهى السحر اللي لفك


أرفعي توبك بكفك


و أهربي


قبل ما تشوفي الحقيقة اللي عنك بس / خافية


انك انتي يا سندريلا الوحيدة


كنتي طول الحفلة حافية

الجمعة، 5 ديسمبر 2008

هزي يا عزة




بار مان

من فضلك وبليز

من غير تهجيص

قول لي يا بارمان

البار ده امان

ولا ملبش ....؟؟؟؟

انا خايف اقول كلمة اتكلبش

أصل القوانين بتنص ..

علي ان النص الباقي لشافط الكل حلال

وكمان ربعين لما يحبش

والناس مساطيل قاعدة تحشش

وسمعت كمان أن الخطة

علي الفقراء كمان نازلة تقفش

علشان ما يكونش ما بينا فقير

ده كتير

الناس دي بتتعب في التفكير

طب صب لي كاس

وبدون أضافات

من غير قرارات / وبدون مزة

هيء هي ء

الله ..................دي احلوت

هزي يا عزة

هزي ووريهم مهارتك

مع خبراتك

هزي وعبي خزاينا ملايين دولارات

دي شناب بتبوس كعب الجزمة / تعمل ازمة في دفع الألوفات

هزي لنا كمان دا أحنا غلابة

عايشين بوعودنا الكدابة

واللي ساترنا حبة أموات

دي الهزة يمين

بتدخل دخل بأسترلين

وبتنعش كل البني ادمين

والهزة شمال

بتنعنشنا درهم وريال

ومتين موال علشان عينك

هزي يا عزة

هيء هيء

بارمان

الحقني

بالمزة

والله أحلوتي قوي يا عزة

بار مان