ما تزرعيش رطب الكلام فوق الجريد
عمر النخيل ما حيقبله
ما تطلقيش فرد الحمام يرحل بعيد
فيه الف فرد حيقتله
طوق الحمام مربوط عليه مليون لجام
عطشان وخايف مـ المطر
قلب الحمام من لما حام
مليان قوي وحينفجر
لو مر قلبك في السما بدل الحمام
قلب المدينه حينفطر
عشقك نزيف الروح علي خد البيوت
عشقك قدر
عشقك برادي مكفنة
مومياء ربيعنا المنتحر
والخطوة بينيا لو قدم
بنشوفها ليه سكة سفر ..؟؟؟
طب مين حايقدر في الليالي المعتمة
يرسم في شمسك و القمر
****
همسة أنينك الف صوت
تعلن حداد موت الكلام
نقبل عزاكي بالسكوت
ونهز رسنا ونبتسم
ونشوف مداكي عـ الحدود
وتميل كتفنا بالرضى
من أجل قوت
تزرع شقانا بالف موت
اما أنا
مش عايز أبقى دونكيشوت
ولا سيفي يضرب في الهوا
ولا عايز أحرت أرض بور
من خلف سور
وأقتل في زرع بيرتوى
ولا عايز احيا جوه منك
زائر غريب
جي م العصور الغابرة
فماتضمنيش وقتن اموت
جوه النهود الفاترة
حزنك بقى الليل الطويل
حضنك صبح مستعمرة
حضن الحدادي للطيور
أصبح امان
حضنك غيلان مستنظرة
ابو زيد زمانك
قتل الهلالي بالف سيف
والظلم ضيف
ساكن في قلب المندرة
حضنك مهوش مستعمرة
عايز اكون
تلميذ في عشقك مجتهد
عايز أدوب فيكي روح
وأخدك واروح
وأنساني فيكي للأبد
عايز اكون ملك الملوك
الحاكم بأمره المستبد
وأفطر عنادك كل يوم
واغزي جيوش السمسرة
ياللي نهودك للغريب كات مقبرة
حضنك مهوش مستعمرة
حضنك ليالي الشوق
في ايام الشغف
حضنك جريد النخل
وسلال الزعف
ياصبره يومك في الليالي المنهكه
يا دارسة فن الفبركة
قلبي عليكي بيرتجف
يا عجوزة أصبى م الصبا
يأم الصبا
يا ام الضفاير 100 حكايا
مسرسبة
يا ام الزنود القاهرة
حضنك مهوش مستعمرة
هناك 8 تعليقات:
بجد الله عليك
^_^
اقتباس
لو مر قلبك في السما بدل الحمام
قلب المدينه حينفطر
...
وقفت كتير اودام الجزء ده
..
جميلة و حزينة
معجونة شجن
الله الله الله يا استاذنا
بسم الله ماشاء الله
والله دايما اقول الجيل الجاى من الفنانين من اهل بلدى
اهنيك على رائعتك
تحياتى
احمد الشاعر
حضرتك فين ؟؟
و ليه الغيبة دى كلها ؟؟
لعل المانع خير
sweet violet
مرور حضرتك ومتابعتك
الشكر غير كافي لحضرتك
اشكر مرورك الجميل
ادامك الله سيدتي
دكتورتنا الغالية اسماء
الحزن اصبح من سيماتنا للسف
بس حنعمل ايه
ست الصبايا
مرورك جميل وربنا
ربي يحميكي
استاذنا الجميل الشاعر
يا فندم بمرور حضرتك ومتابعتنا
اكيد حنكون جيل جديد مشرف
كل التقدير علي مرورك الكريم
استاذي
اصعب شئ على الشاعر انه يسمع من الناس كلمة (الله الله )على وجعه ، فيارب ما يكون اللى كتبته يكون وجعك ، سلمت من كل اذى يا استاذنا
إرسال تعليق