ليلتي أنا

في عيون حبيبتي المخلصة
بلقى البراح فدادين أمل
والقى الليالي المظلمة
مترسمة بدر اكتمل
والقاكي فيه كل المنى
والليلة دي ليلتي أنا
وانا لسة في كتابك حبيبتي
بصمة شفايف بنكتب
و الليلة دي انا بوعدك
ننسى العذاب
ننسى الألم
ننسى الحليب اللي انسكب
وما تسأليش
وتوهي مني في المدى
مين السبب
الليله دي
عايزك حبيبتي ترقصي
فوق السحاب
الليله دي مسموح حبيبتي كل شيء
الا العتاب
الليله دي راح ينفتح
ع الدنيا لينا الف باب
وتضمنا نسمات ربيع
تسحبنا من الضيق للرحاب
الليلة دي ليلتي أنا
وانتي الحنين المستكين
بين الضلوع
وانا ليكي بحر بينتظر فردك قلوع
يلا أكسري الليل الطويل
ده أنتي الضياء اللي اترسم جوه السما
شيء مستدير
وانتي اللي أجمل م الجميل
انتي القمر
وانا الحبيب المنتظر
جامحه خيولي بين صفوف المشتاقين
وبتنتظر غزو القمر
الليله دي مني أنا
راح تلبسي قلبي المطرز بالمنى
الليله دي بايدين حنيني حتلبسي
فستان فرح
راح تشفي من لمسة ايديكي الدفينين
قلبي البريء اللي انجرح
الليلة دي
حانطوف في اطراف السما
زي الطيور
ننزف حنين فوق في السما
نبدر زهور
وان دوبنا في الليل الحزين
راح نتخلق من تاني نور