عشقك فصول اربعة

حأتهجا روحك حروف
وحا أقول بسم الله
وأتعلم التشكيل
في نطق أحزانك

لا هزت راسي موافقه
ولا صمتي تعبير رضا
ولا موت الربيع بالغصب
حا يقرب ميعاد الشتا
ولا ريح الخريف دردشة
ولا صوت الحفيف وشوشة
ده همس الورق خربشة
علي خد أيامك
أنا اللي رسمت الفصول سطرين علي ورقة الأيام
وأنا اللي هجرت البراح لما................
زحموني في الأحلام
وانا اللي لبست الربيع ياسمين
وبنيت له 100 ضلة
وبقيت علي قلبهم عله ومية عله
يا محلى براد شاي يحضن دفا نارك
وحصيرة مع قلة
********
م أسكندرية لمصر مشوار يهد الروح
عفر الطريق غيم / الرؤيا للمجروح
وصلت طنطا وقفت
الجسم سكندري و القلب مصراوي
وأنا مرمي في السكة محروم من الأتنين
سهم العجب هزني شق السما نصين
والدمع زي الحليب بيرضع الخدين
سن الكلام شفرة متفسرة الوشين
والخوف عليكي حبال بتكتف الكفين
ضل البابور سكتة
ومين حا يسكتة
غير قطفة م الخدين
*****
قومي أقطفي لنا العنب من فرعك الدبلان
قومي احرتي خدك من وقفة الغربان
قومي اقلبي هدمتك
قطف العنب ده عيد
فرطفط في حجري الحب
وأنا اللي قاعد الضملك م العنب عناقيد
وانا اللي بشاورلك بس .........
من بعيد لبعيد
وشلت صبري رفيق و سافرنا أرض بعيد
لما الخريف هدده شبح الربيع جاني
يسأل سؤال مبتور مين ع العنب جاني ...؟؟؟
حدفت قلبي ردود
مع أني مش فلاح ولاكنت فكهاني
دانا اللي باني وباني وباني
ومعلي بنياني
وانا اللي موصوف في التاريخ
أصلي حلا ...واني
*******
أشغي يا دود القز وغطي بدنها حرير
انا ارضي كان حضنك
والبذر كان تقبيل
وحياة سيدنا الحسين
قولي
من اللي باع أصلك
أنتي ..؟
أنا ...؟
ولا مين..؟
وخلى بروازك هرمين ونهر النيل

داعبي جنوني

ضعي الحنين آياتً فوق جبيني
وأرقيني رُقىَ الصالحين
عمديني بماء رقراقُ المنايا
من دموع العاشقين
ودعي الدعاء عن ظهر قلب
لا يفيد في ليالي الغاضبين
فأنا لست ملاك
ولا أنتي من الذاكرين
******
أتركي الدعاء
وداعبيني
وأشبكي معصميكي بمعصمي
وأزرعي النراجسُ في حقُول شفاكِ
وأرويِ النراجس من فمي
لا تندمي
إذا أمسينا سكارىَ
من شراب الياسمين
وأعلمي
هذا الشرابَ.......
أخر ما تبقى من دمي
****
داعبي جنوني كطفل
يهوى العبث
يهوى التسكع في الحارات
يهوى العبث في الليالي المقمرات
يهوى تحطيم الكؤس الفارغات
يهوى أطفاء القناديل في حفلات السمر
يهوى الخطر
يهوى الصعود الي القمر
****
داعبي جنوني كطفل
يهوى الجنون
داعبي جنون طفل فوق رمال شطئيكِ
يبني القلاع والحصون
داعبي جنوني كطفل يهواكي
كما يهوى ممارسة الفنون .......
في كل أشكال الجنون
***
دعي جنونك يمضي في رفقة جنوني
وللنسى
نحن سوياً
بعيداً
لا أسالك من تكوني
دعي جنون طفلك
يثير هبات جنوني
يدمر فوق شطئيكي قلاعي
يداعب زهرة النرجس فوق أسوار حصوني

*****
داعبي جنوني كطفل
وأمضي معي الي روض البراءة
في معقل الأطفال
وهناك أسكبي من راحتيكي كل الوان الخيال
وأنثريني فوقهم
غمَامُُ تمدك بالظلال

***
داعبي جنوني كطفل
يهوى قراءة الوجدان
يهوى قراءة جدائلك

كما يهوى قراءة الفنجان

دموع البدر

هنا مشينا
نلاعب زهرة النرجس
في زاوية ركن كان هادي
هدؤ الموت
هنا غزلنا كلام مبهم
بخوف مكتوب علي الشفه
سكوت في سكوت
وبأرادة العذاب فينا قطعنا الصوت
هنا قضينا كام ساعة
في عنصر وقتنا المهدور
تتحسب سنوات
هنا مرينا
ولقينا ميعاد قطرنا كان فات
هنا برضوا
دمع البدر غرقنا
فحسينا
بأن نبضنا مسافر مع الأموات
و هنا وقفنا
علي باقي الرُفات
ننده
بنفس النبرة اللي كات طالعة زفير صامت
وكانت في الكلام نسمة
بدت كرياح
تطير باقي أروحنا
فا رُوحناَ بدون نبضات
هنا مشينا وأحنا مش عارفين
ده فجر بيتولد عاجز
ولا
ده شكل غروب
بيشهق شهقة الميت ... بيتكفن مع الأموات
لأن الوقت في الوقتين
كما التوأم
بيتعجز علي عكاز شفق حساس
فمات فينا في لحظتها باقي الأحساس
وتركنا الفجر بيعاني سواد الليل
وكنا احنا الكلام كله
كأن الدنيا مخلوقة بدون الناس
وبين صمتك وصوت صمتي
مسافة سرب م السمان
مهاجر أرضه بيدور علي واحة
وقع ريشة في عز ماكان / بيحضن نشوة الطيران
وبداء البرد يتسرسب داخل روحة من الدوران
فضربة السلك في العالي
في شيء غالي
فمات صامت
هنا
في زاوية ركننا الهادي
هدؤ الموت
وهنا نمنا في غيبوبة
فنامت كل مشاعرنا وتوهنا في دايرة الأوقات
لشوفنا طائر السمان ساعة موتة
ولا جمعنا دموع البدر وسكوتة
ولا قولنا
ولا سكتنا
ولا لحقنا قطرنا العاجز
ولا خطينا في المسافات
هنا قلبي
هناك قلبك
وبينهم مسافة شقشقة وغروب
وسمان
مأمن باللي كان مكتوب

أخر قصيدة حب

أحتار معايا القلم
نشف المداد جواه
وحروفي صابها الخرس
مش ناطقة غير الاه
والروح اخدها الورق
وأتفرفطت جواه
راحت وراح الحس
وكذِب القلم لو حَس
يخجل من التشكيل
دي البسمة كت تجميل
علي وش كان بيغش
كذاب يا شاعر قوي
وكذبتك أشعار
ازي بتضحك قوي
وجواك هشيم بالكوم .. وكلاه طروف النار
وازي بتكتب عشق وانت الجريح جامد
وبرغم حداد القلم
جواك الكلام صامد
فرفط بقية غنوتك
علي محتاجين القول
ليِل وقول مواويل
وحذاري من التطويل
ده الليل عليك لو طول محتاج ل 100 قنديل
وضيك خيوط دايبه
حا يموت من التنسيل
وفجرك كذب ومجاش
واللي كتبته بروح
في البيعة راح ببلاش
حاول ما تستناش
قطر الصباح عداك
واللي انت شايفة هناك
الغاز كانت شغلاك
أفرك عينك بالغصب
من غلوشة رؤياك
ده سن القلم مقصوف في أخر قصيدة حب

ست الحزن

أفتحي أبواب كلامك
قولي كل المستخبي
ليه تخبي
م البدايه
رتبي حروف الحكايا
والبسيني توب مطرز من منايا
كوني يوم زي الصبيا
وأفردي اخر غنايا
فجر صابح فوق ضفايرك
وإِشتهيِ لحسة شفايفك
ويا فنجان قهوة سادة
لو في مرة كنتي قاعدة في قهوة بلدي
دقدقي لي عشرة بلدي
واجمعيهم في الحساب
لو كتاب
الجبر ضايع
اكتبي بطباشير صوابعك
ان انا في هواكي طايع
خربشيهم فوق حيطان مدنة كلامك
وارفعي مـ المدنة صوتك
هللي لمي الهلايل
فوق هلال المدنة شوفي
لفي طوفي
بين قلوب كل الخلايق
اللي كان سكران بكاسك واللي فايق
واللي كان مهموم بعشقك واللي رايق
ولعيالك بصي شوفي
أرمي زغاريدك في طوفي
ضحكيهم ضحكتين
وصبي أخر دمعتين
جوه كاسك
حسي ناسك
واللي كان في العشق ناسك
واللي فاكرك
واللي ناسك
وأقلعي في الخوف مداسك
وأزرعيهم خطوتين
خطوة منك تبقى خضرة
وخطوة كانت للزناتي
وابدري روحك ليلاتي
شق فجر ما نيتهيش
واشبكي دمك في دمي
ميلي ويا الموجة يمي
شدي عودك يبقى اخضر
ده المقدر
كله كان مكتوب عشانك
قصة واحدة
انه جالك
دق باب من بيبانك
نفسة كان ......!!
رخرخي ترابيس بيبانك
افتحيهم
وامنحيني
عقد شرعي
يلتقى عودك بفرعي
ينبت الأفراح بزرعي
وفي علامك علميني
وانتقامك موتيني
وإنسحابك أبعديني
وأنسجامك كلميني
ده اللي قام الفجر صلى لجل ترضي
قام لوحدة
قام وجمع بس قصر /لجل يلحق
رغم ان الفرض فاتة
يوم مماته
مات مأمن
ان نور الصبح كامن
بين ايديكي
ان قرص الشمس خايف
من عنيكي
و بايدكي تحرقي كل القصايد
ده اللي رايد
حاول يسرق الفرض في سنه
قام وشاف القبلتين
اتجاهه كان لقبلة
فوق كفوفك وقت كبر
حط قبُلة
بس قبلىَ
اطلبي ينسون وحلبة
دا انتي لسة فيا حبلة
يوم مخاضك
اولديني بين قصايدك كلمتين
حتى في التشكيل في اسمك خططيني ضمتين
فوق حروف ممدوة منك
ده لأنك
كنتي دنيا / بس مش مخلوقة ليا
او لغيري
واللي كان ممنوع في شرعك
إن يحوم في سماكي طيري
تصيبة لعنة فرعون زمانك
اللي كان شادد ايمانك
انك انتي
كنتي اخر وردة طالعة بين حقول الميتين
كنتي ست الحزن جارف
بين حواري المحرومين
كنتي آيه جوه سورة / ادخلوها امنين
بس بابك كان موارب
طب لمين ...؟؟؟
الشاطر حسن
ما اعتقدش
الشاطر حسن / يا ست الحزن
لما فات
شاف الدمع كحلة في عيون البنات
حس الطيور مسروقة منها الزقزقات
لم كل الذكريات
جوه شنطة من سكات
ولما صابة الأندهاش
راح مجاش
بس كان في الذهن كلمة
ما قلتهاش
انتي أيه....؟؟؟؟
انتي امي ولا بنتي ولا اختي
او حبيبة
ولا احلامي الغريبة
ولا فدادين الكلام
ورغم نسياني لملامحك
لما اصحى او انام
بلتقيكي جوه فنجان الصباح
طعم قهوة فوق لساني
ايد وبتخبط بيباني
نسمة بتهزهز كياني
وافتح الجرنان اشوفك
صورة مرسومة في افيش
حتى دخان السيجارة
كنتي انتي
تدخليني متخرجيش
وابتدي يومي بوجودك
ويبقى يومي كله حيرة
طول نهاري محيراني
و جوه نومي
من كوابيسك بعاني
بردوا لسه مُصر ابداء بيكي يومي
بردوا لسة مُصر أحلم بيكي تاني

يا غزلة على الوتر ابليس

وعاش أدم
في أحضان الجنان فيكي
يطوف م الخلد للفردوس
يمر بنهر من ريقك
يخطي يدوس
مابين عنبك ما بين تينك
ويتقسم علي ضلك شجر رمان
ويشرب من نبيد شوقك دفا وامان
ويتغطى بلهفة عطرك المجنون
دفا عطرك علي صدرة
يعيش جوه الدفا مسجون
وباب البدر متوارب
يسرسب من ضياة رغبة
على حسنك و يتعاجب
ويحسد اللي كان واقف يبص يطل
يشوف أرض العشق في شفايفك
ويزرع فوق تضاريسها زهور الفل
وتبقي له ملاك أبيض
وأنسيه
وجنْيه
وكل الكل
علي كتافه
يشيل شوقك
ويقطع بين حقول شوكك
فتدمى كتافه حنية
سنونو الجنة ينده له يداوي له جراح عشقك
ويبداء في الملاغية
وسحرك للعذاب يشتد
يكون للمشتاقين غية
وينسى
بأن في سحرك الممدود
في ايد ابليس
جيوش من دود
بتنخر ستر ورق التوت
وتبقى عورته خوفه
علي ضلعة اللي عاش أعوج
فا ياخد قطمة من خدك
في لحظة ضعف
فيسقط عنه ورق التوت
في لحظتها
من الجنة بسحر عنيكي الأخاذ
صبح مطرود
&&&&
يا عازفة علي الوتر أبليس
في معزوفه وكام كلمة و تفاحه
يكون الموت علي صدرك هدف ادم
وفي التسبيل سبيل راحة
وتبقى الروح في روحك عايشة مرتاحة
ورغم الروح بفعل الموت ما هيش جيه
مابين أيديك تعيش حية
فا تنزل فوق بدن من طين
نتوه في أرض مجهولة ونتفرق علي جبلين
ونتقابل كمان مرة
بدل نور السما من طين
ونتبادل بكسرة عين
ضياع الستر كان لأثنين
عرايا وقت ما خلقنا
بدون التوت
وبعد الخلد في الجنة علي ارض الذنوب
حنموت
وابليسك يغرقنا في بحر الظن والتأويل
يذكرنا بانا كنا في الجنة حجار صمه
كما التماثيل
لا جسمك كان يثير شهوة
ولا تأثير
لادوقت فيها رعشة شفتك لما
ولا عرفنا يعني ايه تقبيل
وأشوف خيرك شبه شرك
كما التوئم
هابيل وقابيل
ومين فيهم صبح قاتل
ومين منا حايبقى قتيل..؟؟
شبعت بعد تفاحتك ولون خدك
الم جارف
شربت بعد رمانك ونهر شفايفك المجنون
انين نازف
فهمت بأن الستر كان انتي
وان الكشف لو مستور كمان انتي
فا حبيتك برغم الذنب
كما انتي
يا خارجة من ضلع كان أعوج وبعد مخاض
وصدري بعد مجيابك صبح انقاض
بفكرك أرضنا جنة
بفكرك بواقي زهرة الرمان .... حا تطرح تحت رجليكي عروق حنة
بفكرك يوم نموت تاني في احضانا
حنرجع بعد تدنسنا تاني الجنة
بفكرك لحظتين صادقين
تكون مني اوتكون منك
تطهرنا
يا بكر في جنتي وأرضي
عشقت موتك في شراييني
عشقت السم في التفاح لو حتى حا يفنيني
عشقت كمان اباليسك
وارضك ويا فراديسك
وعزفك ع الوتر ابليس
وأحب القفلة والترابيس
علي بيبان غضبك الأزلي
واحبك لو كلامي يكون بالجد
أو هزلي

سندريلا

سندريلا

قصة مش كاملة الملامح

قصة مالهاش في التراث أي عازة

وبأِجازة نص وهمي رسمتي صورة

يا سندريلا

كل الوانها تحدد نقطتين

هي ظلمك ويا حلمك والأمير

واللي بينهم سحر ساحر...!!!

بس كان السحر فاشل

لما سحر السحرة شدك

أختاريك حدد الحجم في غبائك

لبسوكي وأرتضيتي

توب وعابك

توب مش شكل توبك

توب وكاشف كل عيبك

توب مطرز / وبإيدكي من ذنوبك

توب وبااااااااااااااااايخ في الموديل

يوحي أن الذوق ده غايب

م اللي صمم واللي نفذ

واللي سحرك

واللي خيط غرزتين

واللي قال أنك مثيرة

وأنتي زي البدر و أكتر

واللي دمع لجل ترضي دمعتين

كلهم راضين غرورك

بس ضاع في العتمة نورك

بين بينين

وبعصاية أبتديتي ترسمي بخوفك مرايا

حاسة أن العمر ضايع

عايشة مش زي الصبايا

شوفتي في مريتك ملامح قلب صافي

قلب حتى البرد يعرف أنه دافي

قلب خايف / خوفة بس عليكي كافي

قلب قادر يشتريكي زي ما نتي

بدون رتوش

قلب لغتة حب وافي

بس أنتي للأسف مفهمتهوش

ولو ذكائك حل الغاز الحكاية

م البداية

كنتي أشتريتي مبعتهوش

كنتي مسكتي في أيد أميرك وأرتقاتي جنب منه

للهوان مسحبتهوش ...!

وأسمحي لي يا سندريلا إني اكسر المرايا

أني أغير في الحكاية

وأسمحي لي مرة تانية قبل انتهاء الوقت المحدد بثواني

إني اخط بدم خوفك النهاية

وقبل ما أنهي الحكاية

الأمير عند وعدة لما وعدك

يوم تموتي ....

راح تموتي ..مرة واحدة ...جوه منه

وقلبة برضوا حا يبقى كفنك

غزلة من حب وحنين

أما دفنك وقت دفنك

جوه قلبه

بين عذارى الياسمين

تن تن

دقت الساعة 12بالتمام

وأنتهى وقت الكلام

أنتهى السحر اللي لفك

أرفعي توبك بكفك

و أهربي

قبل ما تشوفي الحقيقة اللي عنك بس / خافية

انك انتي يا سندريلا الوحيدة

كنتي طول الحفلة حافية