كتاب حواديت

ومكتوب لي أحبك / حب متقدر ..

وأعيش العمر متحسر ..

علي ايام فاتت قلبي ..

وكان الحلم ده مرايتي..

أشوفك فيها ياأميرتي ..

وأخاف لا مرايتي تتكسر..

وأتذكر

لساني لما ينطقها

بحبك..

الاقي صوتك الساكت

تقولي كمان أنا اكتر ..

وتبقى النشوة واخدني..

كا عود اخضر ..

وشيلاني وحدفاني ..

على خد الكلام يحلى ..

ادوق سكر ..

وتبقى الكلمة حيرانة ..

ما بين قلبي وبين قلبك ..

الاقيها كتاب حواديت..

فيه اميرتي محبوسة ..

في قصر بعيد..

وقلبي ناوي يخطفها..

علي حصانة ..

وحاسس ان زمانة ..

زمااااااااااان خانه ..

وقاعد يقراء ويفسر..

مع القهوة في فنجانة..

يشوف البدر لو يصبح ..

قمر بجناح..

يفوت القصر..

وياخدها في ارض براح ..

ويندها ..

انا خايف من الأيام..

تعالي يا قلبي ضميني..

وخبيني ..

مابين قلبك وبين ضلعك..

مكان قادر يجمعنا..

ويحميني

دا انا منك ..

انا هو اللي كان تايه..

ما بين الحلم ومرايتك..

انا شجر الزمان طارح ..

وضليتك..

انا هو مش الصورة ..

اللي مرسومة..

كتاب حواديت ..

طقوس

مارس طقوس الأنهزام
ده الحلم نام
لما النهار بقى مفترق
والليل حزام
يسحب منامك للقلق
و الصمت ريق الألسنة
والكلمة سهم بتتخلق
والخوف حبال بتكتفك
مين غفلك ...؟؟؟
مين اللي خلى الصمت في خضم الجدال
يلعب عليك و يكعبلك
واقع يافارس من سروج الأحصنة
ممكن تقول مين وقعك ..؟؟
وانت اللي ماشي في السبل .
ما أنتش نبي ولا عمر يوم حا تكون
( هبُل)
ولا عمر يوم راح تتقبل
ولا لك قبيله جاهلين راح تعبدك
وتشيعك علي مرقدك
ولع بضلعك موقدك
برد اللسان قربان نيران
راح توهبه فوق مدبحك
يحرق لهيبه ثورتك
لملم بواقي الضلع اللي انخلع
وأبقى اشتري الأه للوجع
حتى الأنين
خارح يشق الشفتين
مجبر يكونلك طوق دهب
حوش دموعك في العلب
حا تبل ريقك لو نضب
حرر ضلوعك
راح تنفعك وقت التعب
اطلق اخر رصاصة رحمة ع السكك
وأهزم تماثيل المدن
لو حتى سيفك من خشب

سرب حمام

تقاطيع ملامح عايشة فيا
بتفتح مسام العشق جوايا
يمصك تراب أرضي مطر
تمتص منك جدوري حياة
*****
قلبي المهاجر جوه سرب حمام
حالف ينام
ما بين عيونك والسما
حالف يشق الفجر في عنيكي
أنما
مشوار طويييييييييييل راح يدبحه
هاجر لأرضك م العجز
وسابني قاعد مطرحه
***
يا هلترى قلبي اللي سافر في الطريق
ولا أنا
يا هلترى لسه في حضني 100 قمر
ولا أتفنى
ومين اللي راسم مواسم هجرة العصافير
علي ارض بور مافيهاش قنا
وانتي نسياني هناك
وانا اللي بشتاقلك هنا
وأرسم جنونك سنبلة و ارض ووطن
يا هلترى
وطنك جنون
ولا جنونك الوطن
ولا العيون المقفولين وطن الجدع.....؟؟؟
ما توشوشيش
وماتقرصبش ودن الودع
سرقوا البياض لما اترمى
ولا حد قادر غير عنيكي عـلى البدع
يا بياعين البخت علي جناب الطريق
دلوا الحمام علي حضنها
ع الصبح الرضيع فوق حجرها
يا مشقشين النور في اطراف الصباح
دلوا النهار على فجرها
علي ارضها
علي عطرها
ده الكل شامم عطرها
وانا الوحيد بسمعه عزف ونغم

صوتك نشاذ

سمعيني بحة صوتك في المدى تراتيل ..
بحة صوتك
بتنشذ المواويل
وإبعتي كسرة النفس في سفر
توصلني قبل شقشقة الخريف بربيع
تدبل عيونك جوه مني
حبة
حبة
وتعاندي موت ورق الشجر
يهرب م الشجر زهر الربيع
في سكات
والجدل المخنوق علي شفة الفصل اللي فات
يصبح في روحك تمتمات

وكل الكلام ما يكفنيش
كل الدموع لو حا تنزف من عيونك ويا عيون الأرض دم
ما ترونيش
وقف عقرب الساعة يعزي
موت اللقا
موت الساعات
موت الأمل جوه العيال
بالأغتيال
نشفت عيونك قبل الخريف
وانا بين سياط الأمتحان
بتأمل وشوش الخلق فوق الرصيف
لحظة أنشغالهم بيكي
وقت ما قسموكي علامات تعجب في العجب
وفتحوا خمارات العفن
وقالوا مين اللي كان سكران بشوقك و اندفن
حلم القتيل كان كفن
وآية تحتوي الرحمة تسبيح في الأيات
حلم القتيل
ذكرى دفيانة فوق شفايف الأمهات
حلم القتيل وقت لطيم الخد
هذيان الكلام ينهد
تدوب الرعشه في قلوب البنات
أحميني من لون رعشتك وقت الفراق
ضميني خوف وقت اللقا
وقت فراقك
كان لقا نفسي
كان فرحتي
لقتني بعد التوهه
بسند عودي علي عودك
ضميني بين اسرارك ورقة في كتاب
ضميني وردة جفت م العتاب
ارميني علي الرف اللي منسي في الدولاب
مستني دور
وماتعصريش الشوف في عيون المكفوفين
الشوف مش بالعيون
الشوف جنين
أغتال
جوه احلامك
انا كنت افوت الحلم وحدي بضحكتي
واخرج حزين
انا كنت والي بين جموع المؤمنين
انا كنت بعكس شعاع الشمس
علي قلبك المعتم
يخلق لي في الحلم قمر
يونس ليل السهرانين
ارمي لي حلم وحيد
لو حتى دايخ بين عيون المكفوفين
كان نفسي ارحل انا مني
وتسكنيني روح
كان نفسي ابراء منك
قبل ما أبراء مـ الجروح
دي اللمة بين المغرمين
بتطمنك
وانا بينهم قتيل الروح
يلا افردي لنا الحصيرة
خلينا ننهي المسئلة
ده اللعب ع الحبلين
مع بهلون جاهل / في سيرك الحياة مهزلة
و الجد في التهريج موت
ماسك في اطرافة كفن
وموتك مش سبب موتي
دانا لسه حي واندفن
أنا لسه بسمع بحْتك صدى
سلب الخريف أرضك البور
بالقضى
انا لسه شايف دمعتك مطر
علي ارضك البور بتزهر جناينك
مُر
واتلف بحجاب دهشتي
واصمت
وصمتي أنا حكمة والحكمة زاد الحُر
واشرب سكاتي ع الريق
دوا
أشفى
تدفى اطرافي من برد عصيانك
واسمع صدى روحي يقول
ما تهزنيش
ما تضمنيش بالغصب
ومتبعتيش صوتك مشوار مع التراحيل
يقطف بواقي الغنا من قلب موالي
وماتحسبيش قوتك
علي وشك المكسور
راح تخفي يوم كسرتك
ورا موكب الوالي
أناكنت ضمك رئة
بتنفسك أشواق
وبخدك وبعلى لفوق
عن دوشة الأسواق
ووقت اللقا بستلف
اللهفة م العشاق
أنا كنت بزرع معاكي الفرح نخل
ورطب عالي
وأغزل نجوم السما جناحين
واحسك وقت ما اجر رجلي من التعب
أخف أحمالي
وأقطف ثمار فرحتك
حبة قلق متكلفته بالخوف
وخوفي عليكي أن زاد
كان كل راس مالي
وسهم القلق ما هوش قتال
وبرغم موت صوتك
بيهز اوصالي

أنا ليكي

أنا لما اشوف الحزن في عنيكي بموت
واتمنى اشيلك جوه نني العين بصر
وأقفل عليكي عيوني براح /وسع الوجود
وأجبر الأحزن /كأن ضلعي اللي انكسر

أنا لما أضمك كأني ملكت الكون
والقى ملامحك م السما طلة
اغزل من شفايفك ربيع مجنون
وأفرد ضفايرك في البراح ضلة

أنا اللي نصبتك في السما شمسي
وأنا اللي غطى الدروشة همسي
وأنا اللي حبيتك 200 مرة في المرة
ونسيت أحب في رحلتك نفسي

أنا اللي عشت اجمع ملامحك من وشوش الناس
وأنا اللي ضميتك رئة من كتمة الأنفاس
وانا اللي ادمنت عنيكي سنين
دي النظرة لعيونك بتخدر الأحساس

انا مين ما بين الكتير اللي حواليكي
يا هلترى سامعة النغم ولا اناديكي
خايف تخدني عنيكي في دوشة التراحيل
وتوه ملامحي جوه منك /وأنساني انا فيكي

أنا اللي اتقتلت بريء من نظرة العزال
وأنا اللي فصلت الكفن من قسوة الأفعال
وأنا اللي حبيت الشتا يغسلني بالنسيان
تنزل ذنوب العشق من قلبي ويعدل الأحوال

أنا اللي واخدك وطن أرض وطين مع مي
ووقت تغيب الشمس يغير القمر م الضي
يا شجرة توت وفروعها بلح امهات
يا صوابع عسالية وكحكة وبراد شاي

يونس

يا واقفة متسمرة ورا شيش متوارب
يا تفتحي الشباك
يا تقفلي الشباك
أنا بتكسف جداً
وأنا بقلعك مني
أحسن تشوفيني
***
من قلب جوف الحوت
صرخ النبي يونس (ع)
لمس الصريخ قلبي
رد الضغيف مجبر
أرمي لي قلبك نجاة
من هدر موج عاصي
الفظني دم في دم علي بر أحساسي
غطي البدن بالوجع من برد أنفاسي
أبلعني باقي أمل وأجتر مني قليل
انا رجلي متسمرة من صلبة المشاوير
والرهبة م المفتعل / محتاجة 100 تبرير
ليه تصلبوني حي
ليه تدقدقوا المسامير
مع أني مش عيسى (ع)
ولا نصب دمي فوق الصليب قنديل
يا ترفعوني قتيل
يا تنزلوني قتيل
يا تخنقوا صوتي
يا تسجنوا المواويل
يا تحسبوا الأيام حسبة مراكبية
نصبوا صوان وانا حي
بدايته كانت دهشتي
ونهاية كان هي
لمي بقى دمعتك
ما تعزنيش فيا
****
تسقط في عيني الصور
تميل في عيني صورتك
أغسل رموشي بركعتين صافيين
أميل راسي تتعدل صورتك ...!!!
أوضي نني العين وأنا بغزلك رمشين
المس بواقي الصور
وأرتلك وُردين
قبل كل الناس / أحصنك مني
وأرسمك فوق شفتي توحيد / وأنا بنطقك آيه
تدفى أوصالي من نبض جوايا
تتسرسب البسملة
تخرج في سري سكات
نفتح حوار ممدود
وتشدنا الحكايات
اقفل عليكي عيني
وأخدك في غيبوبة ونضيع مع المتاهات
*****
في عز دوشتهم القاكي لحظة صمت
وفي عز حكاويهم القاكي حدوتة
وفي عز قسوتهم بلقاكي حنيه
والقى ضفايرك روح متعلقة فيا
وأنا لسه بلعب معاكي
عسكر وحرامية
وأتخبى في حواري الوجع
وتدوري عليا
وأتسحب في ليل مسجون
أوصل حدود موتي
تديني قبلة حياة
تردي الحياة ليا
***
في شارع الحب الحرام
متمددين رصيفين
من كتر دق البشر علي ضهرهم ماتوا
تتهز أشكال البيوت
وتوه معاني المدن
ويميل عمود النور
علي زاوية الشارع
****
بعد الوجع بساعات
شوفتك بتاخديني
غمضت عيني في صمت
وسلمت لك أيدي
ودوبتي جوايا
مع حقة في وريدي

دور عليك

عارف لما تنتبه
علي شيء مالوش في الكون وجود
يضغط عليك ويخلي روحك توجعك
وفجاءة ياخدك من إيديك للي أنت مش مستوعبة
وفي لحظة تانية يرجعك
وتمد ايدك عشان ما تمسك في الحياة
تلقى الحياة زي الهلام
فا تشر روحك من سكات أطنان اللام
تسأل في نفسك كام سؤال
تكويني ايه
انا اصلي ايه
أنا اصلي روح ولا بدن
لو كنت روح
الروح ما بتحسش وجع ....؟؟؟
برغم أنه اللي أتوجع
جزء وعايش في البدن

هل تعلم
أنا
أيوه أنت
أنا بعد البحث عني .. ملقتش أنا ....!!
ومازلت ببحث عن ملامحي ... وربنا

سرقت بصة جوه مني لقيت بصيص الشوف طشاش
يقولي ده ..هو أنا ..
أستْنظرة
وأستنَظرة في حيرة وقلق
القاه مجاش ....!!
والاقني روح من غير جسد
والروح صايبها أنكماش
يطلع زفير من العجب
ويصبني نوع م الأندهاش
انا كنت مريت هنا
ولا . أنا ........زي اللي عاش
وكأنه عمره في يوم ما عاش
****
وأسأل في روحي مية سؤال
أنا روحت فين...؟؟
يا هل ترى أنا شوفتيني
يا هل ترى كلمتني ولقيتني حي زيكم
تقولي شوف
بص هناك
شايف في ركن الدنيا اللي مرسومه مفيش
دور هناك
جايز برضوا ما تلقيش
او جايز تلاقي أجابة قادرة تشبعك
وجايز تلاقي شكل مش شكلك
أو ملامح عمرها ماحتشبهك
أو اي وش ما يشبهكش م الوشوش
ولا اقولك
يمكن تكون محبوس في شيء
لسه الحياة ما بتعرفوش
دور عليك
بهدؤ
هدؤ كمان
جايز تكون حالة جنان
ومحسساك
ان انت جوه منك الف قفل من غير بيبان
وجايز تكون محبوس
جوه زنزانة ملهاش حيطان
اصل الجنان
أنك تشوفك شيء غريب
برغم أنك مش هنا
ولا حتى كنت في يوم هناك
يعني نهاية المسالة
انت لا روح
ولا حتى يوم كنت البدن