صوتك نشاذ

سمعيني بحة صوتك في المدى تراتيل ..
بحة صوتك
بتنشذ المواويل
وإبعتي كسرة النفس في سفر
توصلني قبل شقشقة الخريف بربيع
تدبل عيونك جوه مني
حبة
حبة
وتعاندي موت ورق الشجر
يهرب م الشجر زهر الربيع
في سكات
والجدل المخنوق علي شفة الفصل اللي فات
يصبح في روحك تمتمات

وكل الكلام ما يكفنيش
كل الدموع لو حا تنزف من عيونك ويا عيون الأرض دم
ما ترونيش
وقف عقرب الساعة يعزي
موت اللقا
موت الساعات
موت الأمل جوه العيال
بالأغتيال
نشفت عيونك قبل الخريف
وانا بين سياط الأمتحان
بتأمل وشوش الخلق فوق الرصيف
لحظة أنشغالهم بيكي
وقت ما قسموكي علامات تعجب في العجب
وفتحوا خمارات العفن
وقالوا مين اللي كان سكران بشوقك و اندفن
حلم القتيل كان كفن
وآية تحتوي الرحمة تسبيح في الأيات
حلم القتيل
ذكرى دفيانة فوق شفايف الأمهات
حلم القتيل وقت لطيم الخد
هذيان الكلام ينهد
تدوب الرعشه في قلوب البنات
أحميني من لون رعشتك وقت الفراق
ضميني خوف وقت اللقا
وقت فراقك
كان لقا نفسي
كان فرحتي
لقتني بعد التوهه
بسند عودي علي عودك
ضميني بين اسرارك ورقة في كتاب
ضميني وردة جفت م العتاب
ارميني علي الرف اللي منسي في الدولاب
مستني دور
وماتعصريش الشوف في عيون المكفوفين
الشوف مش بالعيون
الشوف جنين
أغتال
جوه احلامك
انا كنت افوت الحلم وحدي بضحكتي
واخرج حزين
انا كنت والي بين جموع المؤمنين
انا كنت بعكس شعاع الشمس
علي قلبك المعتم
يخلق لي في الحلم قمر
يونس ليل السهرانين
ارمي لي حلم وحيد
لو حتى دايخ بين عيون المكفوفين
كان نفسي ارحل انا مني
وتسكنيني روح
كان نفسي ابراء منك
قبل ما أبراء مـ الجروح
دي اللمة بين المغرمين
بتطمنك
وانا بينهم قتيل الروح
يلا افردي لنا الحصيرة
خلينا ننهي المسئلة
ده اللعب ع الحبلين
مع بهلون جاهل / في سيرك الحياة مهزلة
و الجد في التهريج موت
ماسك في اطرافة كفن
وموتك مش سبب موتي
دانا لسه حي واندفن
أنا لسه بسمع بحْتك صدى
سلب الخريف أرضك البور
بالقضى
انا لسه شايف دمعتك مطر
علي ارضك البور بتزهر جناينك
مُر
واتلف بحجاب دهشتي
واصمت
وصمتي أنا حكمة والحكمة زاد الحُر
واشرب سكاتي ع الريق
دوا
أشفى
تدفى اطرافي من برد عصيانك
واسمع صدى روحي يقول
ما تهزنيش
ما تضمنيش بالغصب
ومتبعتيش صوتك مشوار مع التراحيل
يقطف بواقي الغنا من قلب موالي
وماتحسبيش قوتك
علي وشك المكسور
راح تخفي يوم كسرتك
ورا موكب الوالي
أناكنت ضمك رئة
بتنفسك أشواق
وبخدك وبعلى لفوق
عن دوشة الأسواق
ووقت اللقا بستلف
اللهفة م العشاق
أنا كنت بزرع معاكي الفرح نخل
ورطب عالي
وأغزل نجوم السما جناحين
واحسك وقت ما اجر رجلي من التعب
أخف أحمالي
وأقطف ثمار فرحتك
حبة قلق متكلفته بالخوف
وخوفي عليكي أن زاد
كان كل راس مالي
وسهم القلق ما هوش قتال
وبرغم موت صوتك
بيهز اوصالي

أنا ليكي

أنا لما اشوف الحزن في عنيكي بموت
واتمنى اشيلك جوه نني العين بصر
وأقفل عليكي عيوني براح /وسع الوجود
وأجبر الأحزن /كأن ضلعي اللي انكسر

أنا لما أضمك كأني ملكت الكون
والقى ملامحك م السما طلة
اغزل من شفايفك ربيع مجنون
وأفرد ضفايرك في البراح ضلة

أنا اللي نصبتك في السما شمسي
وأنا اللي غطى الدروشة همسي
وأنا اللي حبيتك 200 مرة في المرة
ونسيت أحب في رحلتك نفسي

أنا اللي عشت اجمع ملامحك من وشوش الناس
وأنا اللي ضميتك رئة من كتمة الأنفاس
وانا اللي ادمنت عنيكي سنين
دي النظرة لعيونك بتخدر الأحساس

انا مين ما بين الكتير اللي حواليكي
يا هلترى سامعة النغم ولا اناديكي
خايف تخدني عنيكي في دوشة التراحيل
وتوه ملامحي جوه منك /وأنساني انا فيكي

أنا اللي اتقتلت بريء من نظرة العزال
وأنا اللي فصلت الكفن من قسوة الأفعال
وأنا اللي حبيت الشتا يغسلني بالنسيان
تنزل ذنوب العشق من قلبي ويعدل الأحوال

أنا اللي واخدك وطن أرض وطين مع مي
ووقت تغيب الشمس يغير القمر م الضي
يا شجرة توت وفروعها بلح امهات
يا صوابع عسالية وكحكة وبراد شاي

يونس

يا واقفة متسمرة ورا شيش متوارب
يا تفتحي الشباك
يا تقفلي الشباك
أنا بتكسف جداً
وأنا بقلعك مني
أحسن تشوفيني
***
من قلب جوف الحوت
صرخ النبي يونس (ع)
لمس الصريخ قلبي
رد الضغيف مجبر
أرمي لي قلبك نجاة
من هدر موج عاصي
الفظني دم في دم علي بر أحساسي
غطي البدن بالوجع من برد أنفاسي
أبلعني باقي أمل وأجتر مني قليل
انا رجلي متسمرة من صلبة المشاوير
والرهبة م المفتعل / محتاجة 100 تبرير
ليه تصلبوني حي
ليه تدقدقوا المسامير
مع أني مش عيسى (ع)
ولا نصب دمي فوق الصليب قنديل
يا ترفعوني قتيل
يا تنزلوني قتيل
يا تخنقوا صوتي
يا تسجنوا المواويل
يا تحسبوا الأيام حسبة مراكبية
نصبوا صوان وانا حي
بدايته كانت دهشتي
ونهاية كان هي
لمي بقى دمعتك
ما تعزنيش فيا
****
تسقط في عيني الصور
تميل في عيني صورتك
أغسل رموشي بركعتين صافيين
أميل راسي تتعدل صورتك ...!!!
أوضي نني العين وأنا بغزلك رمشين
المس بواقي الصور
وأرتلك وُردين
قبل كل الناس / أحصنك مني
وأرسمك فوق شفتي توحيد / وأنا بنطقك آيه
تدفى أوصالي من نبض جوايا
تتسرسب البسملة
تخرج في سري سكات
نفتح حوار ممدود
وتشدنا الحكايات
اقفل عليكي عيني
وأخدك في غيبوبة ونضيع مع المتاهات
*****
في عز دوشتهم القاكي لحظة صمت
وفي عز حكاويهم القاكي حدوتة
وفي عز قسوتهم بلقاكي حنيه
والقى ضفايرك روح متعلقة فيا
وأنا لسه بلعب معاكي
عسكر وحرامية
وأتخبى في حواري الوجع
وتدوري عليا
وأتسحب في ليل مسجون
أوصل حدود موتي
تديني قبلة حياة
تردي الحياة ليا
***
في شارع الحب الحرام
متمددين رصيفين
من كتر دق البشر علي ضهرهم ماتوا
تتهز أشكال البيوت
وتوه معاني المدن
ويميل عمود النور
علي زاوية الشارع
****
بعد الوجع بساعات
شوفتك بتاخديني
غمضت عيني في صمت
وسلمت لك أيدي
ودوبتي جوايا
مع حقة في وريدي

دور عليك

عارف لما تنتبه
علي شيء مالوش في الكون وجود
يضغط عليك ويخلي روحك توجعك
وفجاءة ياخدك من إيديك للي أنت مش مستوعبة
وفي لحظة تانية يرجعك
وتمد ايدك عشان ما تمسك في الحياة
تلقى الحياة زي الهلام
فا تشر روحك من سكات أطنان اللام
تسأل في نفسك كام سؤال
تكويني ايه
انا اصلي ايه
أنا اصلي روح ولا بدن
لو كنت روح
الروح ما بتحسش وجع ....؟؟؟
برغم أنه اللي أتوجع
جزء وعايش في البدن

هل تعلم
أنا
أيوه أنت
أنا بعد البحث عني .. ملقتش أنا ....!!
ومازلت ببحث عن ملامحي ... وربنا

سرقت بصة جوه مني لقيت بصيص الشوف طشاش
يقولي ده ..هو أنا ..
أستْنظرة
وأستنَظرة في حيرة وقلق
القاه مجاش ....!!
والاقني روح من غير جسد
والروح صايبها أنكماش
يطلع زفير من العجب
ويصبني نوع م الأندهاش
انا كنت مريت هنا
ولا . أنا ........زي اللي عاش
وكأنه عمره في يوم ما عاش
****
وأسأل في روحي مية سؤال
أنا روحت فين...؟؟
يا هل ترى أنا شوفتيني
يا هل ترى كلمتني ولقيتني حي زيكم
تقولي شوف
بص هناك
شايف في ركن الدنيا اللي مرسومه مفيش
دور هناك
جايز برضوا ما تلقيش
او جايز تلاقي أجابة قادرة تشبعك
وجايز تلاقي شكل مش شكلك
أو ملامح عمرها ماحتشبهك
أو اي وش ما يشبهكش م الوشوش
ولا اقولك
يمكن تكون محبوس في شيء
لسه الحياة ما بتعرفوش
دور عليك
بهدؤ
هدؤ كمان
جايز تكون حالة جنان
ومحسساك
ان انت جوه منك الف قفل من غير بيبان
وجايز تكون محبوس
جوه زنزانة ملهاش حيطان
اصل الجنان
أنك تشوفك شيء غريب
برغم أنك مش هنا
ولا حتى كنت في يوم هناك
يعني نهاية المسالة
انت لا روح
ولا حتى يوم كنت البدن

عشقك فصول اربعة

حأتهجا روحك حروف
وحا أقول بسم الله
وأتعلم التشكيل
في نطق أحزانك

لا هزت راسي موافقه
ولا صمتي تعبير رضا
ولا موت الربيع بالغصب
حا يقرب ميعاد الشتا
ولا ريح الخريف دردشة
ولا صوت الحفيف وشوشة
ده همس الورق خربشة
علي خد أيامك
أنا اللي رسمت الفصول سطرين علي ورقة الأيام
وأنا اللي هجرت البراح لما................
زحموني في الأحلام
وانا اللي لبست الربيع ياسمين
وبنيت له 100 ضلة
وبقيت علي قلبهم عله ومية عله
يا محلى براد شاي يحضن دفا نارك
وحصيرة مع قلة
********
م أسكندرية لمصر مشوار يهد الروح
عفر الطريق غيم / الرؤيا للمجروح
وصلت طنطا وقفت
الجسم سكندري و القلب مصراوي
وأنا مرمي في السكة محروم من الأتنين
سهم العجب هزني شق السما نصين
والدمع زي الحليب بيرضع الخدين
سن الكلام شفرة متفسرة الوشين
والخوف عليكي حبال بتكتف الكفين
ضل البابور سكتة
ومين حا يسكتة
غير قطفة م الخدين
*****
قومي أقطفي لنا العنب من فرعك الدبلان
قومي احرتي خدك من وقفة الغربان
قومي اقلبي هدمتك
قطف العنب ده عيد
فرطفط في حجري الحب
وأنا اللي قاعد الضملك م العنب عناقيد
وانا اللي بشاورلك بس .........
من بعيد لبعيد
وشلت صبري رفيق و سافرنا أرض بعيد
لما الخريف هدده شبح الربيع جاني
يسأل سؤال مبتور مين ع العنب جاني ...؟؟؟
حدفت قلبي ردود
مع أني مش فلاح ولاكنت فكهاني
دانا اللي باني وباني وباني
ومعلي بنياني
وانا اللي موصوف في التاريخ
أصلي حلا ...واني
*******
أشغي يا دود القز وغطي بدنها حرير
انا ارضي كان حضنك
والبذر كان تقبيل
وحياة سيدنا الحسين
قولي
من اللي باع أصلك
أنتي ..؟
أنا ...؟
ولا مين..؟
وخلى بروازك هرمين ونهر النيل

داعبي جنوني

ضعي الحنين آياتً فوق جبيني
وأرقيني رُقىَ الصالحين
عمديني بماء رقراقُ المنايا
من دموع العاشقين
ودعي الدعاء عن ظهر قلب
لا يفيد في ليالي الغاضبين
فأنا لست ملاك
ولا أنتي من الذاكرين
******
أتركي الدعاء
وداعبيني
وأشبكي معصميكي بمعصمي
وأزرعي النراجسُ في حقُول شفاكِ
وأرويِ النراجس من فمي
لا تندمي
إذا أمسينا سكارىَ
من شراب الياسمين
وأعلمي
هذا الشرابَ.......
أخر ما تبقى من دمي
****
داعبي جنوني كطفل
يهوى العبث
يهوى التسكع في الحارات
يهوى العبث في الليالي المقمرات
يهوى تحطيم الكؤس الفارغات
يهوى أطفاء القناديل في حفلات السمر
يهوى الخطر
يهوى الصعود الي القمر
****
داعبي جنوني كطفل
يهوى الجنون
داعبي جنون طفل فوق رمال شطئيكِ
يبني القلاع والحصون
داعبي جنوني كطفل يهواكي
كما يهوى ممارسة الفنون .......
في كل أشكال الجنون
***
دعي جنونك يمضي في رفقة جنوني
وللنسى
نحن سوياً
بعيداً
لا أسالك من تكوني
دعي جنون طفلك
يثير هبات جنوني
يدمر فوق شطئيكي قلاعي
يداعب زهرة النرجس فوق أسوار حصوني

*****
داعبي جنوني كطفل
وأمضي معي الي روض البراءة
في معقل الأطفال
وهناك أسكبي من راحتيكي كل الوان الخيال
وأنثريني فوقهم
غمَامُُ تمدك بالظلال

***
داعبي جنوني كطفل
يهوى قراءة الوجدان
يهوى قراءة جدائلك

كما يهوى قراءة الفنجان

دموع البدر

هنا مشينا
نلاعب زهرة النرجس
في زاوية ركن كان هادي
هدؤ الموت
هنا غزلنا كلام مبهم
بخوف مكتوب علي الشفه
سكوت في سكوت
وبأرادة العذاب فينا قطعنا الصوت
هنا قضينا كام ساعة
في عنصر وقتنا المهدور
تتحسب سنوات
هنا مرينا
ولقينا ميعاد قطرنا كان فات
هنا برضوا
دمع البدر غرقنا
فحسينا
بأن نبضنا مسافر مع الأموات
و هنا وقفنا
علي باقي الرُفات
ننده
بنفس النبرة اللي كات طالعة زفير صامت
وكانت في الكلام نسمة
بدت كرياح
تطير باقي أروحنا
فا رُوحناَ بدون نبضات
هنا مشينا وأحنا مش عارفين
ده فجر بيتولد عاجز
ولا
ده شكل غروب
بيشهق شهقة الميت ... بيتكفن مع الأموات
لأن الوقت في الوقتين
كما التوأم
بيتعجز علي عكاز شفق حساس
فمات فينا في لحظتها باقي الأحساس
وتركنا الفجر بيعاني سواد الليل
وكنا احنا الكلام كله
كأن الدنيا مخلوقة بدون الناس
وبين صمتك وصوت صمتي
مسافة سرب م السمان
مهاجر أرضه بيدور علي واحة
وقع ريشة في عز ماكان / بيحضن نشوة الطيران
وبداء البرد يتسرسب داخل روحة من الدوران
فضربة السلك في العالي
في شيء غالي
فمات صامت
هنا
في زاوية ركننا الهادي
هدؤ الموت
وهنا نمنا في غيبوبة
فنامت كل مشاعرنا وتوهنا في دايرة الأوقات
لشوفنا طائر السمان ساعة موتة
ولا جمعنا دموع البدر وسكوتة
ولا قولنا
ولا سكتنا
ولا لحقنا قطرنا العاجز
ولا خطينا في المسافات
هنا قلبي
هناك قلبك
وبينهم مسافة شقشقة وغروب
وسمان
مأمن باللي كان مكتوب