تركتني

تركتني
وظننت أنك بالفراق هزمتني
نسيت أنك ابتديت
ونقضت عهدي وخُنتني
يارجلا
تجري الخيانة في دمك
كالموج حين يصدني
ياليتني
مزقت كل قصائدي
ودفنتُها ودفنتني
أتظن أنك نلت مني بفعلتك
حين ارتميت في حضنها
وهربت مني وفتني
هل تذكر يوم التقينا منذ أعوام مضت
وشكوت لي ضعفك
وضممتكُ وضممتني
هل تذكر الفنجان حين قرأته
ووصفت كل ملامحي
وقلت انك تهيم بي وتحبني
ياليتك بين أحضاني ارتميت
وبالحنان سكنتني
كم كنت حمقاء أنا
حين مني سرقتني
وصمت ضاحكةً أراقب ضحكتك
وظننت أنك بالأمان صنتني
كيف لخائن أن يصون حبا
لم يشق فيه ويعتن؟
كم كنت أتمنى الفراق
وقلبي الغبي يوم افترقنا ردني
فكم كتبت فيك القصائد يومها
يا ليتني أحرقت كل قصائدي
ودفنتها ودفنتني

وطن وكأس

آتيني بكأس كي أثمل
على عمر قد ضاع بعيداً
عن وطن لا أذكُر فيه غير الأطفال
غير العواجيز وحكايَاهم
عن جن ساكنٍ في قصرٍ
لم يبق منه في قريتنا غيرُ الأطلال
آتيني بكأسِ
علٌي أتذكر شواطئناَ
وأمثل دور البحار
في حلمٍ كان يراودُني
وأنا أركض خلف العصفور
أن أبحُرَ وألف الدنيا
على قارب خشبي مكسور
لكني عشت بلا مأوى
وبدون هوية رحالاً

مثل العصفور
آتيني بكأس
كي أثمل على نهد قد أصابه فتور
فنبيذك يجعلني رجلاً
أشتاق لكي أغدو جسوراً
فالخمر في رأسي يذُكره
يجعله يدور ويدور
في هذه البقعة كنا نلهو
نركض
نمرح
ونضل طريق عودتنا
ونظل ندور وندور
لم يأخذني الظن في يومِ
أن وطني مثل الأطفال
يوما سيتوه
ويظل الجن في قريتنا
ويظل القصر المهجور
آتيني بكأس
اثنين ... ثلاثة
آتيني بقنينة عتق الأوطان
فأنا ربان
وسأرحل
أسأل أطراف المعمورة
أسأل عن وطني الشطآن
أسأل تجاعيد عجائزنا
أنبش أقمشة الأكفان
أسأل عصفوراً قد أيقن
أن الأشجار في بلدتنا
تقتل بيديها الأغصان
آتيني بكأس
كي أثمل على وطن
قد يغدو في يومٍ قبرا
أو يغدو في يومٍ بستان

قالوا عني

قالوا عني

إن الورد حين يزهر

لا يتجراء أن يتلون

قبل أن يأتي

ويستأذني

وإن المطر حين يتكتك

فوق زجاجي

ليخبرني

بأنه يكسو الأرض ربيعا

حين الضحكة تلامس سني

وقالوا أيضا

إن لي قلب حين يدقدق

يعزف نغماً

يجعل كل نساء الأرض تغني

وإن النسوة في مجالسهم

يحكوا حكايا

وكل حكايا النسوة

عني

قالوا كثيراً

جداً جداً

وانا القاطن

بين شفاهم أبحث عنها

لتلملمني

وتجمعني

***

يا سيدتي إني اتوق الي شفاتيكِ

لتحررني

وإني براء من حكاياهم

وأن الشعر في عينيك

ِلا أكتبه

بل يكتبني

وأنتِ قصيدة أبحث عنها

فيا سيدتي بين حروفي

أبحثي عني

فأنا من أيقن أن العشق

في مملكتك

لأ أجعله بل يجعلني

أترك كل نساء الدنيا

لتكوني سرَ بيني وبيني

***

يا أمراتي

اني العاشق

حتى نهاية نهر العشق بيني وبينك

لكي نور قلبي

ولكي تتمني

ان اكتبلك الف قصيدة

في عينيكِ

لأن الشعر في قلبي يغني

مدينة البُن

في كل صباح

أتلصص بين حواري البُن

كي ألمح شفتاكِ

حين تُعانق حبات القهوة

وتداعب أطراف الفنجان

أتلصص وأنا أعلم أن

للبنِ عيونٌ تفضحني

ترسمني فوق الجدران

فأخترق حدود البُن

وأتسلل

أتلمس أروقة الفنجان

أعبر شفتيك بتأني

أتحسس كل الأركان

أتعجب!

هل يعقل

أن القهوة حين تعانق شفتيكِ

لا تمتص رحيق الشفتاَن؟

أم أن الروج الخمري

يتهادى

ويلون أطراف شفتايّ

فوق الفنجان؟

سيدتي

للبن مدينةٌ وحصون

وخيول تحت الفرسان

شفتاكِ من تأمر فيها

عنياكِ تصدر فرمان

تقتل من تقتل برموش

كسيف ماضِ الحدّان

توهب من توهب نظراتِ

تفرح أو تحزن إنسان

حين تمر في شوارعها

تحرسها جنود الريحان

وأنا والقهوة وشفتاكِ

كل السكان

كل السكان

سيدة القهوة

والياسمين

وعرش الريحان

أنا من يعشق شفتيكِ

لم أجد لنفسي يا سيدتي

غيرك عنوان

محاولات فاشلة

فشل اول
كنت قد اقسمت أن اهديكي قلبي
فهل لقلبي تقبلين
فشلت أنا......
كيف أهديكي شيء
انتى له تملكين ...؟؟؟؟

فشل اخر
بعثريني بين شفتيكي حروف
وأجمعيني بين كفيكِ حنين
فشلت هي
أنا من ذاب فيكي
فكيف تجمعيني منك
لو تحديتي السنين ..؟؟؟

فشل أخر
كل ذنب الندى
أنه يعشق من الزهور الياسمين
فشل الندى
كلما أشتاق يغسل وجنتيكي
من هديرة تهربين

أعلم جدا
عيناكي ترمقني
تسجل أنفاسي
تقراء في تأني كلماتي
تحصر خطواتي
فشلتي أنتي
أن تعلمي
أنكِ أجمل من كل صفاتي

حين تقابلنا حروفاً
عبر الأوراق
ضاعت كل ملامح
علم النحو وعلم الصرف
فشلت أنا
حين تركت عنان
الحرف يقبل خد الحرف

فشل جديد
لم يكتب بعد ...!!!!!!!

ولد عاشق

في نمنمته صبي عاشق
في عفرتة شقي مجنون
لكنة حنون
بيعشق طرح أيامك
وأحلامك
سما صافية وأبن حنون
ولد عاشق
ببسمة شفته الناشفة يدوب يحلم بلقمة عيش
وهدمة خيش
ونومة تحضن الحيطة
كما الدرويش
عايش راضي
ومش راضي
يكون هايف ولا فاضي
ولا مكسوف
وكان الخوف
ملجم في الحشى روحة
معشش في زوايا الجوف
ولد عاشق
وكان رافض عيون الذل
وكان شارب عشان خاطرك
دموع المر
وهو الحر اللي متجسد
في ضهر الحر
ولد عاشق
عيونه الليل في كحلتهم
بترسم في الليالي نهار
عيونة البدر لو صبح
علي عنيكي
تقوم ثوار
تبات ثوار
وتبدر في الصحاري خضار
ولد عاشق
بيغزل شمسك العاشقة
دفا وحنين
ومن عشقة
بيتقسم
في يوم البرد لو طاغي
على الميادين
يوزع شهد أحلامه
علي الصايمين
وقالهالك
انا في الحمل شيالك
انا ابنك
انا سندك
انا يا بهية موالك
انا الفجر اللي كان خطفة سواد ليلك
انا الأرض اللي سواقيها
بقيت موال يغني لك
انا الزيت اللي بينور قناديلك
واكون في المغنى منديلك
وانا الدير وانا المدنة
انا المصحف و انجيلك
وانا من نبض شراييني
جرى نيلك
يا حبالة
يا ولادة
يا شاربة المر بذيادة
أنينك رد لي روحي

مالك ......؟؟؟؟؟

مالك
قلبك مهزوز
وكأنك شايل حمل جبال
بتدور جواك
اساطير
حكايات
وبتطلع من جواك اجابات
محتاجة سؤال
اولهم
مالك..؟
بتجوز دمعك للمناديل
في حفلة عتمة بدون قناديل
والورد حزين
يمكن علشان
دمعتك النازلة على الخدين
بتمرر طعم التحويجة
فتضيع ملامحها مع الفنجانين
تقلب فجانك
تتبصر
فايقول
مالك...؟
بتخبي عنيك
بأيديك
وتعد عدد وتقول خلاويص
تهرب تتخبى بدون تمييز
ورا حزنك ولا في اوجاعك
تتدارى ورا اول ضحكة
تسمع خطوتها في تقاطيعك
يتكى عليك الوقت
ويشدك
ويقول
افراحك واقفة وراك
تتلفت فاتقولك
مالك...؟؟
متشرب خوف
ما هي اصل الدنيا/
حجج و ظروف
وحروف
بتغزل بيهم حبل حرير
تغريك بكلامها
وفي لحظة
تطير
تتعلق في طروف ضفايرها
تلاقى ضميرها
مشنقة وحبال بتمد
فا تموت
مبسوط
ما هي دنيا ولسة بتسال
مالك..؟؟
بتبيع العمر بكام مليم
والعند لئيم
بيوقع أوراق بستانها
وبتجري
فا تشد في اطراف فستانها
تتشعلق
يتكر الخيط
تتعرى
تحضنها عشان تستر روحها
اتاريك عريان
يسألك التوت خجلان
مالك...؟؟؟
بتحب ؟؟؟؟
تبقى انت اكيد ما بتعرفشي ...
الفرق
مابين ومابين
الدايرة وشكل الخط
بدايتهم نقطة
نهايتهم عنصر مش مجهول
لو تعرف قول ...!
يبقى انت فهمت ازي حا تموت
الخط كفن
والدايرة تابوت
والنقطة بداية عنصر مش موجود
لو يبقى كلامي
مش مفهوم
مش عيب
أسأل
مالك ....؟؟؟؟
لساك بتقرب م الحاوي
أبو فكر غويط
بيلاعبك علي انك قرد
غاوي للتنطيط
من ركن لزاوية لتحت لفوق
ما تفوق
وأنساك م الحاوي ابو فكر غويط
أنت الانسان
واكيد
حاتغير نظرية فرويد
مالك ...؟؟؟؟

دعيهم

دعيهم
يجلسون
ويسردون الحكايا والقصص من حولنا
يتوهمون بإننا
زرنا الجنان بقُبلةٍ
وهَطلنا زخات مطر
تروي الحنين في ارضنا
فتراقصت من حولنا
بتلات زهر السوسنة
دعيهم
يظنون بإن الجبال والحقول والصحاري أزهرت
وتوحدت كل الفصول في لحظة
فصل ربيع واحداً
يوم التقينا ضمنا
دعيهم
يذكرونا كعاشقين متداولون في السير
يتوارثونا الرواةِ بالربابة والغنى
دعيهم يدعون
بإني كفرت بكل دين العاشقين
وامنت إنكِ انتي النبؤة والرسالة
والعقائد كُلها
وسننت دستور لنا
دعيهم
يدعون بإنهم رسلوا رسول للهداية والعظة
فعصا الرسول امرهم
وسلك الرسول دربنا
فأنا إذ اشركت في شرعهم
فقد امنت بشرعنا
وإذا شكونا للقضاةِ
وأغلقت كل السبل
كوني عصور الجاهلية بجهلها
كوني هبل ُ
وإذا اُسرنا
كوني الجدار والحجر
كوني القدر
كوني شعاع في ليالينا التي
من وجنتيكِ خجل القمر
كوني طبيعة غاضبة
اجتاحي انحائي كا اعصار
يحمل عناقك والقُبل
ثوري كبركان انفجر
فيفيض عشقك في الميدان
ويستعر
ضمي بيديكي وجنتي
قبليني
ودعيني اثمل قبل موتي
من نهر شفتاكِ الذي
يُسكر بشهدٍ كالخمر
كم كنت انتظر اللقاء بلهفة
من ينتظر المغفرة
عن ذنب عاصً لا يغتفر
كم كنت اكره القيود في معصمي
واليوم اعشق قيدي معك
واغض بصري عن المفر
فهذا واقعنا والقدر
ان نحياء كالغرباء بينهم
ونلتقي وقت الفراق و السفر

اول خطوة

امبارح
اول ماسمعت الدوشة
وصوت الناس
خدني الأحساس
بالزنقة وكامب شيزار
بالضحكة الصافية في وقت هزار
مع شلة وصحبة حلانجية
و ليالي الشوق والمنشية
مع صوت الست علي الكورنيش
لما تليل
حسيتك جانبي ومسكاني
وبعدي الشارع
واتصارع
مع 100 بياع
بيبيعوا الفل على العشاق
ضاع الأحساس
بالخوف منك
من لما لمحت البت الحبيبة من طرف الشيش
بتأكل كده كام عصفورة فتافيت العيش
وتشاور للواد ع القمه
بزهور الشال
حسيت بملامحي بقت مرسال
بينه وبينها
بتقولك افهم بقى يا بني
إن انا حباك
من كتر ما شاورت بقلبي
زهق الشباك
حسيت بعنيكي مطاوعاني
وبتحسب كام موجة تعدي
وانا وحدي بشوف الناس جوه عنيكي
وبشوف ملامحها في تقاطيعك
والناس الرايقة على القهوة
بتلعب طاولة
وفي اول جولة
معاكي خسرت
اول ما قرصت الزهر
الطارح في خدودك بساتين
وشفايفك بتوشوش ودني
مرتاح
وانا
علي سورك قاعد ومدلدل رجلي الأثنين
وبلاعب بصوابعي المية
وأقرا الأحساس في عيون الناس
اللي بتعشق
لياليكي
وواقفة علي القمة
بقى بالذمة
فيه اجمل من سحر عنيكي
ونهارك لما بيتزوق
ويزيد في غرامك ويشوق
ده انا فارد روحي ومروق
وبمزمز شاي في الخمسينه
وصوابع قلبك ترقينا
وتاخدنا في مشاور ع المينا
نركب حنطور
لجلن ما نزور
المرسي وابو الدردار
والقلب فنار
بينور للعشاق ليلهم
والبدر الموشوم في خدودك هو دليلهم
وتشدي مِلايتك علي الأخر
والزقلك من خسن جمالك
ما اقدرش اتاخر
والكعب العالي بيقسم فوق الأسفلت
مزيكا
وعزف كمان ونايات
وفي راسك منديل ابو أويه
والفل الطاير بيرفرف من غير جناحات
وتدور حوالينا في مشيتنا
عيال وبنات
ع الرملة بيجروا ورا الموجة
وفي وسط الهوجة ودوشتهم
أسمع حكايات
كام عاشق سهران يتمنى
كام قلب اتجراء وتئنى
وحط شفايفة علي خدودك
ده امبارح بس عرفت بإن الحب ده كائن حي
وعرفتك لما تكوني حنونة وقاسية
وحلوة ومرُة
ومرارك بيحلى الشاي

رحال

الحلم مهما يكون طويل

في وقت فجر بينتهي

وانا قلبي لما بيشتهي

سطر النهاية في الحكاية المحزنة

بيشدني لكلمة ختام

ابقي اذكريني في الفصول الأربعة

نسمة ربيع

هبات مطر

رياح خريف

لحظة جنون شبه الندى

فوق غصن عاجز منكسر

ابقي اذكريني في الشتا

وقت الرزاز ما بينحني

ويضم اوراق الشجر

ابقي احكي عني للمطر

للأرض للصيف للقمر

ابقي اكتبيني في القصص

عصفور وطاير في السما

اتحدى في عنيكي الخطر

وقولي كان بيحبني

وانا قلبي كان زي الصخر

ابقي ارسميني لما اتوه

برواز وفاضي من الصور

وقولي قلبة كان حياة

وانا قلبي مات زي الوثن

وقولي كان بيحسني

للحسن ست

مع انه مش شاطر حسن

لكنة كان السندباد

يرحل بيعيد

ويموت في احضان البعاد

لكن يعيش وقت اللقا

وابقي اذكريني لو خريف العمر هو ناحيتك

وقع بواقي الحلم في عيونك صور

احكي بعنيكي للسكك

قولي للرصيف

للأعمدة

للدراويش المنشدة

للعاشقين جنب الطريق

من كام سنة

مر حبيبي من هنا

لكن رحل

ولا ساب لخطواتة اثر

حمار بدوي (2)

من بدوي لصفية

اللي شوفتة يا صفية من جوابك
شيء يغم
اولاً
أفهمي معنى الساسية
السياسة يا صفية خد وهات
يعني مثلا
الوزير اللي حدانا مرة فات
لما يكل ديك شامورت
ولا فرخة م البرابر
عمره ما ينسى بلدنا للممات
والشباب اللي قاعدة
دول كسَلا
والمجاري ديه سماد
والمرض لو طب واحد
ده قدر رب العباد
يعني لازم نتعظ
ونقول
اللهم لا اعتراض
يعني راح اصدق كلامك
واروح اكدب الشاشات
افتتاح مشاريع بكلفة مليارات
ده يبقى كذب
ارض خضرا وعمارات
يبقى كذب
يعني توشكى ونوشكى
وحفر صخر بالألات
كله كذب
اصحي يا صفية حبة
وافهمي
ان لسة الخير مالينا
ولو كلامك يبقى صح
احنا اللي خلينا الديابة
ترعى فينا
عمتاً
نفضي الكلام ده من دماغك
وخبريني
البنية حد جه اتكلم عليها
و لا لسة بنت دار
وابعتي سعر الحديد
وطمنيني ع الحمار
****

من صفية للغالي بدوي

اولاً
ارضنا نشفت يا بدوي
ومعدش مرعى للحمار
والشعير بقى عملة صعبة
سعرة مربوط بالدولار
و البيطار
دايخ في مرضة
بدوي
امسك اعصابك
الحمار طب مات
شد حيلك
والبركة فيك
والحوالة مانت عارف
يادوب تكفي
يعني مش حا اقدر اجهز
للحمار خرجة تليق

والبنيه فارت يابدوي
وجسمها طرح البشاير
والشباب عنيها عليها
بس مفيش حد قادر
والجدع اللي بيشقى
يدوب يجيب علبة سجاير
الجواز
اصبح مصيبة
والجهاز
مابقش بطشت او حصيرة
الجواز محتاجة له دار
وماكينة كمان تقشر
البطاطس والخضار
والولد محتاج دروس
والدروس عايزة فلوس
والحوالة يدوب تكفي
كام رغيف من غير غموس
والوزير
حدد زيارتة لبلدنا بالميعاد
قلنا احسن
بقى عنده دم
بس كل ما يبقى فاضي
ينط حدانا بالساعات
واللي عنده فرخة صاحية بيدريها
تقولش عنده مخدرات
الطيور خلصت يا بدوي بالتمام
والغفر دلوقتي داير
ع الغراب و الحمام
ومعدش حد قادر يفتح بؤه بالكلام
واحنا لو كنا 100
الغفر بقوا 500
يعني ناقص يربطونا باللجام
دا حتى لما يبقى ماشي
كل برسيم المواشي
لزريبة الوزير
بس شايفة
انك انت نسينا خالص
وف جوابك اللي فات
كتمت الحسرة من كلامك
جوه قلبي من سكات
ليه يا بدوي
تغم بالي كل مرة
احنا بنموت كل يوم
الف مرة

حمار بدوي (1)

من بدوي الي زوجته صفية

يا صفية
عاملة ايه ....؟؟؟
طمنيني عنك انتي وع العيال
طمنيني عالحمار
والحيط اللي بنيتة لبنة لبنة
لسة صامد ولا مال
اصلي شوفت المطرة سيل
سيل وجاري من بلدنا
بيلم روح الخلق لم
م اليمين و الشمال
والغفر بتلم غلة بالشوال
لجل ما تغدي الوزير
اللي جاي
يعدل الحال اللي مال
طمنيني وابعتي لي كل ما تدلي بندر بالرسايل
والبسي حشمة يا بت
ما انتي عارفاني
بكره الحال اللي مايل
حتى هنا في الغربة طبعي
مالوش مثايل
الكفيل مبسوط بطبعي
وبنشاطي ع السقايل
كلنا الصبح نسرح
اللي يعبي في سمنتو
و اللي فوق كتافة شايل
بس جوزك
لسه صالب عودة بينهم
مش زي غيره ضهرة مايل
انتع الكروانة واطلع للسطوح
حتى من غير الفطار
عمري ما حسيت بجوع
ولا تعبتني السقايل
العزيمة يا صفية
هي هي
والفلوس اللي باخدها
الحوالة
و اللي تبقى
جوه جيبي متدرية
نفسي ابنيلك يا بت
دار مسلح
ولا حتى غرفتين
ما انتي عارفه حلم عمري م سنين
بس من دلوقت اقولك
ما تقوليلي عايزة مطبخ
ابني فرن م الحجارة ولا طين
والكنيف
اقضي حاجتك والعيال
عند جارتك
ولا اقولك
بينك وبين مسجد بلدنا خطوتين
ادعي بس ربك يسهل
واقدر ابداء في العمار
وقتها راح ابني عشة للحمار
وفي مكانة راح يناموا العيلين ..
وفي جوابك الجديد
ابقي قولي
اسعار السمنتو والحديد
وطمنيني ع الحمار والعيال
****

من صفية الي زوجها بدوي

مشتاقه لك
اول كلمة في جوابي
مشتاقه لك
اما باقية كلامي
مشتاقه لك ..
مشتاقه لك ..
مشتاقه لك
محتاجين لأيدك تطبطب فوق عيالك
ليه ناسينا
قولي مالك
العيال كبرت يا بدوي
اللي سبته في ابتدائي
السنه دي تالته ثانوي
والمطر اللي شوفتة سيل وجاري
دي مجاري
بنروي بيها
والفرا وصلت بلدنا وسارحه فيها
اللي عنده الكلوة باظت
واللي مسكاه غرغرينا
والدرة طالع مسرطن
والمرض بيحش فينا
والوزير اللي يزورنا
بقدرة الخلاق بلدنا
تختفي منها الزبالة
وتتفرش رملة و زينه
والغفر لمو العتاقي والبدارى
وخد امارة
من يوم زيارتة
الزفر ما مر جارنا
ولا ريحة طبخة طلعت جوه دارنا
مش احنا بس
حتى جارنا
واللي جنب جنب جارنا
والحمار اللي ساترنا
جاله م الهم اكتئاب
لما شاف غنمات بلدنا
اللي رعياها الكلاب
والدياب
عبت بلدنا
ليل نهار بتعوي فينا
واللي لينا
ماصبحش لينا
والشباب ع القهاوي ليل نهار
خالية شغل
بتعاكسنا وترزينا
وانا
معدتش اقدر ادلى بندر او مدينة
وانت لسة جاي تسال عالحديد
الله يخرب بيت الحديد
و اللي زاد سعر الحديد
خلاص ماعدش عندي نفس
لدار جديد
ارجع انتي وسط اهلك
تكفينا عشتنا الجريد
المهم نتلم تاني
حتى لو بين سما زرقا وارض طين
جوه خيمة بدون جدار
وانت عندي ب100 حمار

كنت بحلم

إنتي عارفة
رغم صمتي وابتسامتي
والمهادوة في الكلام
كنت خايف
بس خوفي كان بينطق شكل ضحكة
تخنق الدمع اللي ثاير من عيوني
حتى لوني
كان في عز الضهر عتمة
والأهات بمضغها لكن
جوه صدري آه و كاتمة
جانب منها ألف آه
كنت بحلم يوم فراقنا
بيوم لقانا
كنت بحلم يبقى لون الدنيا يومها
زي جنة
حتى دمعي لو أطوله
يبقى حنة
تحنى ايدك
وفي وريدك ينبض القلب المسافر
في الطريق
كنت حاسس إني جوه عنيكي عايم
مش في احزانك غريق
كنت بحلم
ايوه بحلم
بس حلمي كان يدوب
كان بيرسم شيء وتايهة
هو انتي ...؟؟؟
بس كان الحلم حالم مش اكيد !!!
عمرك انتي شوفتي يوم المطرة حمره
لون حمار الخد لما يتكسف وقت الوعيد
لون شفايفك
لما تعصى
لما تلبس لون عنيد
يومها كات الشمس باردة
خايفة تقسى ع المسافر
و الشوارع
يوم مشينا وقلبنا ع الدنيا طارح
الف فرحة
والغريب في القصة اني
كنت شايل شنطة فاضية
شنطة خالية م المتاع
الا حرف بين ضلوعي
مستحي يقولك وداع
حتى رعشة ايدي لما .....
في السلام
رددت اخر كلام
اوعي تنسي
يوم لقانا
لو في يوم الرحلة راجعة
للديار
خلي قلبك فيه عمار
وانظري للشرق ديما
وابقي شاوري بكل عزمك
يمكن اضهر او ابان
حبي جامد
حبي أخر حتة فيا
واحب اخر حتة فيكي
ولو طوفان الرحلة خدني
لسه ناوي
اسمع الحرف المتلج فوق شفايفك
حتى لو من غير معاني
ولو اعاني
مش مهم
المهم اني اعود لك
اني اشوف الفجر طالل لو للحظة
من عنيكي
وبأيديكي
تمسحي عفر الطريق

ليله

وقت زقزقة صوتك
في ليلة ما كتش محسوبة
لا هي ميلادي
ولا هجري
وقبل الضي ما يسلم شعاع نورة
طلعت أجري
علي حضنك
لقيتك عايشة جوايا
ودمي يسري فيه نضبك
بقيتي الشاي والنعناع
بقيتي الجمر والسكر
بقيتي خمر أيامي
أفوء وأسكر علي خدك
وأتمشى علي قدك
ومين أدك
ملكتي كل شيء فيا
عروس البحر والمية
في وقت الجزر عفريته وجنية
ووقت المد من مدك
نسينا الوقت والأيام
وانا وانتي
بعدنا بعيــــــــــــــد
ولا عرفنا
حدود البحر من حدك
ونمنا
وجانا الصبح بيخبط بيبان روحنا
لا صحينا ولا فوقنا
ورمش عيوني شمسية
سحابة عشق من فوقنا
بتحمينا
وحوالينا
قناية عشق مشتاقة
تبل ريقها من ريقنا
و جميزة بتفرد طرحها وردة
نطري بيها أشواقنا
تنقط شهد من الخدين تشوقنا
لكام بوسة
نتوه في القاعدة والبصه
ندَوب في الحديث روحنا
وننسى أننا قاعدين بنتسامر في هود الليل
نفكر أننا روحنا
وتسقي شفتك وردي بـ 100 قصة
تفكرني بستي لما تحكيها
أربع رجلي وأستنى تقوليها
ونتسابق أنا وانتي علي الكلمة
ونتاَخر
ما بين صوتك ورجفة قلبنا الحيران
نقول في كلام مالوش أخر
ونركن راسنا ع الشجرة
ونحفر فيها كام كلمة
فترسمنا الفروع حرفين
في قلب وسهم بيغني
وبيدندن حروف ع الناي
وتكتبنا شعاع من فجر بكرة الجاي
نولع جمر أشوقنا
ونعمل شاي
في سهرتنا
روحك تفرشيها بساط
و قلبي يتفرد أرضك
وأنا رايدك
تكوني معايا سهرانة
في ليلة البدر متخبي
وسايب ضية في عنيكي
تعاند النجوم ضيك
الاقي الليل بقى ضلمة
معرفشي في لحظتها
برغم الشوق
أقول في عنيكي ولا كلمة
لكن قعدتنا بالدنيا وما فيها
يطولنا البرد
تلفيها
روحك علي قلبي
ويحضن كفنا البراد
يفور الشاي من شوقة
ويغلي الطفل في عروقة
و يتسحب علي أيدينا
دفا يسري يدفينا
الاقي إيدكي تتشعلق علي كتافي
تباتي الليلة جوايا
ياخدني النوم في أحضانك
وأتوه مني لحد الصبح

عرض خاص

مسرح ,,,
ديكور ,,,
كمبارس جاهز للدخول
وممثلين مستنظرين
فرصة ظهور
فتح الستار
علي سترهم
بقعة ضي هربانة
متمركزة علي قلبهم
كواليس كتير ممدودين
في السر تحضن سرهم
مجاميع كمان متأهبين
عرض الفصول مع حلمهم
يتجننوا
لحظة دخولهم للكلام
حوار طويل فات من سكات
من نَص آية في صمتهم
والعرض خاص
بينه وبينها والديكور
****
في مسرح صمتنا الحالي
مابين كواليسنا ع الداير
عيون الخوف من المجاميع
حجر داير
بيطحن كل شيء فينا
ويكتبنا
فصول في رواية محروقة
نجددها بكام ضحكاية مسروقة
تخبي رهبة الجمهور
اتاري الضحك كان ساهل
لكن أحنا عمنا النور
ويعلى صوتنا في الصالة
فيكتم ضحكنا الكواليس
نقوم بعرض أول حلم
والتاني
حكاية صمت عـ الخشبة
ونهرب من عيون الناس
و بين العجز والقدرة على التجسيد
تضميني في لحظة خوف
أحس برجفة المشهد
ومين يشهد
من المجاميع بإنك كنتي تهويني
وأنا بهوى
أضم عنيكي في الكواليس
وأجل وشوشة صوتك
ليوم تاني
نسيب الخشبة والجمهور
****
سنين بننزيف الضحكة
نكررها بنفس القدرة في التمثيل
سنين بنمثل المشهد
بيني وبينك بدون جمهور
منيش قادر أمسح دمعك الليله
ما نيش في المود
ولا قادر في لحظة نزف من روحي
أعيش الدور
أنا حاسس بان دراعي اللي كان واصل بيني وبينك
صبح مبتور
انا حا اتخبى جواكي
لأن الضلع اللي بيجبر ضلوع خوفك
صبح مكسور
وحا انسى
عينيا الليله في عينكي
عشان الليلة في الصالة
مفيش جمهور
مفيش في الصالة ولا واحد
مفيش غيرنا
تعالي نجمع حلمنا بكرة
على إمبارح
ونطلع نجري في الشارع
وننسى النص والمجاميع
****
إيدي في إيديك
تعالي نهجر المسرح
تعالي نمشي وسط الناس
ونلعب تاني في الشارع
يترجم عشقنا الأحساس
وأخبي نفسي وردايا
في صفحة عشق في الكراس
وننسى اننا احنا
وناخد نبضنا جمهور
ونبداء فصلنا الأول
بدون خشبة
بدون كواليس
وحتى ديكور

هل ........!!!!

ما أعرفش ليه
من غير ما أحس
بمد إيدي جوه مني القاكي أأأأه
أدعي الأله
و أطبطبك
وأفرد عليكي الروح غطا

خوفك مقفل الف باب
من خلف باب
هل من عذاب
يفتح شبابيكك غنىَ
رعشة صوابعك ع النغم
خنقت اللحن اللي باديء يبتسم
عزفك ولونك المخطوف
قطع الوتر
فين عفيتك
فين ليلك المشحون سهر
فين العيون الملضومين
ومشكلين علي حبل شباكك
قمر
يا مين يرد القلب اللي ناوي علي
السفر
يا مين يرتللي حكايات الربيع
وأنا في الطريق
ويصون عيوني من العفر
هل من قدر
يخلق تراتيلك إيدين
تاخد بإيدي من السكك
هل من قدر
يبدل الحزن المتلتل بالفرح
يسحب شهيقك يزفُرة
صوت دندنة
هل من ميعاد
يجمع خطوينا البعاد
ويصحي فينا اللي أتخنق
ده الحلم لما بيتقطع
بحلم ببكرة يكملة
وأقطف ليالي الحلم من عين الشجر
ويسود سكون الغضن وقت يرتله
ضمني جمر وكاس دفا
أدفي قلبك في الشتا
وخدني درع ورقوتين
حصن لسهام كل العدا
وأشربني خمر المشتاقين
وما تنسنيش وسط طريق
مسروقة منه الأرصفه
ده انا اللي برويك في الطريق
وقلبي ميت م العطش
وانا اللي ليل السكات
فرحان بخوفي من القلق
صابح يصبح ع الوجع
عاش الوجع
إمتى نشيد الصبح في عيونك يقول
مات الوجع
دي الروح ازاز
اي أهتزاز
راح تنكسر
وانت اللي ضلك تحت منك منكسر
لا قدرت مرة تصلبه
وتعيش كما كنت زمان
خالي الوجع
دي حاجات كتير كت محتجاك
غيري أنا
لون السما
عشقك لصمتك
وأشتياقك للكلام
وأنفعالك
وقت عزفك سمفونية من القلق
أفتح شبابيكك حياة
أفتح مسامك بالصور
رجني وقت التمتمة
من روحي أحدف لك قمر
دي البوسة منك للحياة
أكسير الحياة
والضمة أطواق للنجاة
وضينى من خدك زلال
محتاج صلاة
طب مين حا يمسح حزننا
غير الأله

قهوة

شفتاكِ
قهوة
وصباحك حين يعانقني
قهوة
بصماتك فوق الفنجان
تحاصرني صباحا ومساء
تنثرني بيوت ومدائن
تأتيني
شفاك
مثل بصيص الفجر
حين يسدل رائحته
دخان سيجارة
وأنتي
قهوة
تخترق حدود الصبح
توقظني
كطيور عشق مُغردةًُ
وبرغم جفافك
أدعوك لتذوبي في
فانا قهوة
وأنا من ألقى بأسراره
من فوق
شفتاكِ وأحزاني الثكلى
طعمك قهوة
تفاصيلك قهوة
وأنا من أهوى
طعم شفتاكِ مع القهوة
وأنا من أدمن
قراءة عينيكِ كل صباح
مع القهوة
وأنا من أهوى قراءة عينييكِ
و القهوة
فافي عينيكِ أخباري
وفي فنجاني أسراري
فذوبي بين أقداري
مع القهوة
صباحك حين يندهني
أذوب في خطواتي
وأخطو مثقل الخطوة
أجوب حواف فنجاني
تعانق روحي روحك
تعانق روحنا
القهوة

حبك ماكنش المعجزة

بتبكي ليه ..؟؟
وبتغزلي من دمعك المسجون
نجاه
ما تشدنيش
دا انا القتيل اللي أبتدى فيكي الحياه
بس قليل
اللي بيفهم في الممات لغز الحياه
يا هلترى
الموت في احضانك حياه
ولا الحياه جواكي موت ...؟؟

ما تفكريش الموت خروج الروح م البدن
الموت فراق
لو حتى داخل م الجنان
جنة عدن
الموت حدود
وجواز سفر مختوم علية
نوع الكفن
ما تركزيش عينك في عيني
وقت ماموت
دي الغربة موت
و عنيكي سوط
وانا ع الحدود
بتجلد
لفيني خوف
بدل الكفن
ضميني رعشة اشتياق
تمسح عيوني من العفن
وارقيني رجفة أم
تتحدى لجنينها الزمن

عايز اشوف صورتي جوه عينك لو رتوش
عايز اخربش قصتي
لو حلم نايم عـ الرموش
دا انا نفسي اعيش جوه حضنك
عمر تاني ما عشتهوش
خبيني فيكي م الوشوش
الموت فراق .........
صدقيني ما هزنيش
هزة ايديكي وقت الفراق هي الوحيدة المؤلمة
رعشة صوابعك وقت هروبها من صوابعي
محددة اخر نفس داخل في صدري
معلمة
وعشقي فيكي لو صدق
راح يكتبوني في ملحمة
كان نفسي احب اخر حته فيكي
قبل ما اعشق سكتك
كان نفسي اسيب اخر حتة فيا
شمعة تنور دنيتك
حبك ماكنش معجزة
المعجزة
ازي انول في الزحمة كل محبتك
لو تسمحي
مع اخر القصص المسافرة
ارحل معاهم
جارر ديول الأنهزام
لوتسمحي
تحسبي لي غربتي والباقي كام
دا انا نفسي ابيع جواكي عمري
لو بكام
شديني من نار الفراق
وما تنطقيش
خدني معاك
ده العشق فيكي أمتلاك
فين ترحلي
وانتي اللي باقيه لي هناك
وانا القتيل المنكسر
خلف الحدود
انا الغريب المنتظر
ضمة حنانك للوجود
يا مصحصة الفجر العنيد
يا شمس بكرة لو تقيد
يا محركة النبض اللي ميت
في الوريد

حضنك مهوش مستعمرة

ما تزرعيش رطب الكلام فوق الجريد

عمر النخيل ما حيقبله

ما تطلقيش فرد الحمام يرحل بعيد

فيه الف فرد حيقتله

طوق الحمام مربوط عليه مليون لجام

عطشان وخايف مـ المطر

قلب الحمام من لما حام

مليان قوي وحينفجر

لو مر قلبك في السما بدل الحمام

قلب المدينه حينفطر

عشقك نزيف الروح علي خد البيوت

عشقك قدر

عشقك برادي مكفنة

مومياء ربيعنا المنتحر

والخطوة بينيا لو قدم

بنشوفها ليه سكة سفر ..؟؟؟

طب مين حايقدر في الليالي المعتمة

يرسم في شمسك و القمر

****

همسة أنينك الف صوت

تعلن حداد موت الكلام

نقبل عزاكي بالسكوت

ونهز رسنا ونبتسم

ونشوف مداكي عـ الحدود

وتميل كتفنا بالرضى

من أجل قوت

تزرع شقانا بالف موت

اما أنا

مش عايز أبقى دونكيشوت

ولا سيفي يضرب في الهوا

ولا عايز أحرت أرض بور

من خلف سور

وأقتل في زرع بيرتوى

ولا عايز احيا جوه منك

زائر غريب

جي م العصور الغابرة

فماتضمنيش وقتن اموت

جوه النهود الفاترة

حزنك بقى الليل الطويل

حضنك صبح مستعمرة

حضن الحدادي للطيور

أصبح امان

حضنك غيلان مستنظرة

ابو زيد زمانك

قتل الهلالي بالف سيف

والظلم ضيف

ساكن في قلب المندرة

حضنك مهوش مستعمرة

عايز اكون

تلميذ في عشقك مجتهد

عايز أدوب فيكي روح

وأخدك واروح

وأنساني فيكي للأبد

عايز اكون ملك الملوك

الحاكم بأمره المستبد

وأفطر عنادك كل يوم

واغزي جيوش السمسرة

ياللي نهودك للغريب كات مقبرة

حضنك مهوش مستعمرة

حضنك ليالي الشوق

في ايام الشغف

حضنك جريد النخل

وسلال الزعف

ياصبره يومك في الليالي المنهكه

يا دارسة فن الفبركة

قلبي عليكي بيرتجف

يا عجوزة أصبى م الصبا

يأم الصبا

يا ام الضفاير 100 حكايا

مسرسبة

يا ام الزنود القاهرة

حضنك مهوش مستعمرة

سنين فاتت

يا زارع ورد احزانك في يوم مجهول

يا غازل فرط ايامك خيوط ع النول

بتستر بيه جروح روحك

بقلع خفيف

وترسم فرحة قدامك

يمشي الفرح في دروبك كأنه كفيف

تلف الحزن اللي متبقى مع عمرك

في وقت مزاج

سيجارة كيف

وتسحب من ضلوع عينك

يطير دخان سنين راحت

في لحظة أه

و ليل بيطول

رماد قلبك يتفرفط في غنواية

عشان مسطول

تفوق حبة

تنفض م الوجع روحك

وتتبسم لبكرة جديد

مهوش باين

وتسأل

ياترى يا بكرة مستني

ويبقى الدمع متأني

ويطفي الشمع

تقسم عمرك الباقي علي الأيام

تبات مديون بكام ساعة

وكام بسمة

وتجري بلهفة الملهوف

لكن فجاءة

لا صوت بتشوف

ولا سامع مدى بصرك

وكل العمر متوقف دقيقة حداد

علي الفجر اللي كان هربان

في نص الليل